குஜராத் மாநிலம் அகமதாபாத்தில் கடந்த 2009-ஆம் ஆண்டு 7 வயது சிறுமி சங்கீதா கொடூரமான முறையில் பாலியல் வன்கொடுமைக்கு ஆளாக்கப்பட்டு கொலை செய்யப்பட்டார். வீட்டின் அருகே கடையில் ஐஸ் வாங்கச் சென்றபோது மாயமான அந்தச் சிறுமியின் உடல், மூன்று நாட்களுக்குப் பிறகு அங்குள்ள அரசுப் பள்ளி கழிப்பறையில் கண்டெடுக்கப்பட்டது. ஆரம்பக்கட்ட விசாரணையில் பாதுகாப்புப் பணியாளர் ஒருவர் கைது செய்யப்பட்டு, பின்னர் அவர் குற்றமற்றவர் என விடுவிக்கப்பட்டதால் விசாரணை முடங்கியது. இருப்பினும், தனது மகளின் மரணத்துக்கு நீதி கிடைக்க வேண்டும் என்ற உறுதியுடன் சிறுமியின் தந்தை போபாஜி, மனித உரிமை ஆணையம் தொடங்கி பிரதமர் அலுவலகம் வரை தொண்டு நிறுவனங்களின் உதவியுடன் தொடர்ந்து பல ஆண்டுகளாகப் போராடி வந்தார்.
தந்தையின் இடைவிடாத முயற்சியால் 2024-ஆம் ஆண்டு இந்த வழக்கு மீண்டும் மறுவிசாரணைக்கு எடுத்துக்கொள்ளப்பட்டது. புதிய விசாரணை அதிகாரிகள், பாதுகாத்து வைக்கப்பட்டிருந்த சிறுமியின் உடைகளை அதிநவீன முறையில் ஆய்வு செய்ததில் அவற்றில் ஒட்டியிருந்த நான்கு முடிகள் முக்கியத் தடயங்களாகக் கிடைத்தன. அவை மரபணு பரிசோதனைக்கு அனுப்பப்பட்டுள்ள நிலையில், சந்தேகத்தின் பேரில் பிடிபட்ட நான்கு பேரில் தற்போது இருவரிடம் மட்டும் காவலர்கள் தீவிர விசாரணை நடத்தி வருகின்றனர். கடந்த 17 ஆண்டுகளில் 150-க்கும் மேற்பட்டோரிடம் விசாரிக்கப்பட்டுள்ள இந்த வழக்கில், மரபணு பரிசோதனையின் முடிவுகள் வெளிவரும்போது உண்மையான குற்றவாளி யார் என்ற நீண்டகால மர்மத்துக்கு விடை கிடைக்கும் என காவல்துறையினர் நம்பிக்கை தெரிவித்துள்ளனர்.