ஐயோ… குதிரை மாதிரி ஓடலாம்னு பார்த்தா… இராணுவக் கனவில் நேர்ந்த விபரீதம்… ஊசி போட்டு ஓடி… ஆஸ்பத்திரியில் சேர்ந்த வாலிபர்கள்… ஆக்ராவில் அதிர்ச்சி சம்பவம்…!

ஆக்ராவில் இராணுவ ஆட்சேர்ப்பு முகாமிற்குத் தயாராகி வந்த இரண்டு இளைஞர்கள், ஓட்டப் பந்தயத்தில் வேகமாக ஓடுவதற்காகக் குதிரைகளுக்குச் செலுத்தப்படும் ஊசியைத் தங்களுக்குத் தாங்களே செலுத்திக்கொண்ட சம்பவம் பெரும் அதிர்ச்சியை ஏற்படுத்தியுள்ளது. 6 கிலோமீட்டர் தூர ஓட்டப்பந்தயப் போட்டிக்கு முன்னதாக, அவர்கள் இருவரும் தலா 3 மில்லி லிட்டர் அளவிலான வீரியமிக்க இந்த மருந்தை உடம்பில் ஏற்றியுள்ளனர்.

போட்டி தொடங்கி ஓடி முடிந்தவுடனேயே, அந்த மருந்தின் கடுமையான பக்கவிளைவுகளால் அவர்களின் உடல்நிலை திடீரென மோசமடைந்தது. இருவருக்கும் கடுமையான தலைச்சுற்றல், மூச்சுத்திணறல் மற்றும் உடல் தளர்ச்சி ஏற்பட்டு மயங்கி விழுந்தனர். அருகில் இருந்தவர்கள் அவர்களை உடனடியாக மீட்டு அருகில் உள்ள மருத்துவமனையில் சிகிச்சைக்காக அனுமதித்தனர்.

https://twitter.com/madanmohansoni/status/2098716750552711298/video/1

தற்போது அவர்களுக்கு தீவிர சிகிச்சை அளிக்கப்பட்டும், மருத்துவர்களின் கண்காணிப்பிலும் வைக்கப்பட்டுள்ளனர். இராணுவத்தில் சேர வேண்டும் என்ற தீவிர ஆசையில், முறையான மருத்துவ ஆலோசனையின்றி இதுபோன்ற ஆபத்தான குறுக்கு வழிகளைப் பின்பற்றுவது உயிர்க்கே ஆபத்தாய் முடியும் என்று மருத்துவர்களும் அதிகாரிகளும் எச்சரித்துள்ளனர்.