பெற்றோர்களே எச்சரிக்கை..! பூங்காவில் 4 வயது சிறுமியின் உயிரைப் பறித்த சறுக்கு மரம்… விளையாடச் சென்ற இடத்தில் விபரீதம்..!!

மகாராஷ்டிர மாநிலம் புனேவில் உள்ள விளையாட்டு மைதானத்தில் விளையாடிக் கொண்டிருந்த 4 வயது சிறுமி, அங்கிருந்த சறுக்கு மரம் (Slide) அவர் தலையில் விழுந்ததில் உயிரிழந்த சம்பவம் பெரும் சோகத்தை ஏற்படுத்தியுள்ளது. இந்த விபத்து புனேவின் பிம்ப்ரி-சின்ச்வாட் பகுதியில் உள்ள ஒரு பூங்காவில் நிகழ்ந்துள்ளது. சிறுமி விளையாடிக்கொண்டிருந்த போது, முறையாகப் பராமரிக்கப்படாத அந்த இரும்புச் சறுக்கு மரம் திடீரென வேரோடு சாய்ந்து சிறுமியின் தலையில் பலமாக மோதியுள்ளது.

விபத்து நடந்த உடனேயே சிறுமி அருகில் உள்ள மருத்துவமனைக்குக் கொண்டு செல்லப்பட்டார். இருப்பினும், தலையில் ஏற்பட்ட பலத்த காயம் காரணமாக அவர் ஏற்கனவே இறந்துவிட்டதாக மருத்துவர்கள் தெரிவித்தனர். இச்சம்பவம் குறித்து காவல்துறையினர் வழக்குப் பதிவு செய்து விசாரணை நடத்தி வருகின்றனர். விளையாட்டு உபகரணங்களின் தரம் மற்றும் அதனைப் பராமரிப்பதில் ஏற்பட்ட மெத்தனப் போக்கு குறித்துப் பூங்கா நிர்வாகத்திடம் விசாரணை மேற்கொள்ளப்பட்டு வருகிறது.

இந்தத் துயரச் சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. பொதுப் பூங்காக்களில் உள்ள விளையாட்டு உபகரணங்கள் முறையாகப் பராமரிக்கப்படுகிறதா என்பதை உறுதி செய்ய வேண்டும் என்று சமூக ஆர்வலர்கள் கோரிக்கை விடுத்துள்ளனர். குழந்தைகளின் பாதுகாப்பில் அலட்சியமாகச் செயல்பட்டவர்கள் மீது கடும் நடவடிக்கை எடுக்கப்பட வேண்டும் என்று சிறுமியின் உறவினர்கள் மற்றும் பொதுமக்கள் வலியுறுத்தி வருகின்றனர்