டைம் முடிஞ்சி போச்சு..! ஈரானிய படகுகளைக் கண்டதும் சுட உத்தரவு.. ஈரானுக்கு ட்ரம்ப் கொடுத்த இறுதி எச்சரிக்கை..!!

ஈரான் உடனான மோதலில் அணு ஆயுதங்களைப் பயன்படுத்தப் போவதில்லை என்று அமெரிக்க அதிபர் டொனால்ட் ட்ரம்ப் அதிகாரப்பூர்வமாக அறிவித்துள்ளார். இருப்பினும், ஈரான் தனது பிடிவாதத்தைக் கைவிட்டு சமாதானப் பேச்சுவார்த்தைக்கு உடன்பட வேண்டும் என்றும், அவர்களுக்கு அவகாசம் மிகக் குறைவாகவே உள்ளது (Clock is ticking) என்றும் அவர் எச்சரித்துள்ளார். ஈரானின் ராணுவக் கட்டமைப்பு ஏற்கனவே வழக்கமான ஆயுதத் தாக்குதல்கள் மூலமாகவே பெருமளவு அழிக்கப்பட்டுவிட்டதால், அணு ஆயுதங்களின் தேவை எழவில்லை என்று அவர் வெள்ளை மாளிகையில் செய்தியாளர்களிடம் தெரிவித்தார்.

ஈரான் மீதான அழுத்தத்தை அதிகரிக்கும் வகையில், மத்திய கிழக்கு பிராந்தியத்திற்கு அமெரிக்காவின் மூன்றாவது போர்க்கப்பலான ‘யுஎஸ்எஸ் ஜார்ஜ் எச்டபிள்யூ புஷ்’ (USS George HW Bush) அனுப்பப்பட்டுள்ளது. மேலும், ஹார்முஸ் ஜலசந்தியில் (Strait of Hormuz) கண்ணிவெடிகளை வைக்கும் எந்தவொரு ஈரானிய படகுகளையும் உடனடியாக சுட்டுத் தள்ளுமாறு அமெரிக்க கடற்படைக்கு ட்ரம்ப் அதிரடி உத்தரவிட்டுள்ளார். இந்த ஜலசந்தி வழியாகத்தான் உலகின் பெரும் பகுதி கச்சா எண்ணெய் போக்குவரத்து நடைபெறுவது குறிப்பிடத்தக்கது.

இதற்கிடையில், ஈரானின் தலைநகர் டெஹ்ரானில் மர்மமான முறையில் வெடிச்சத்தங்கள் கேட்டதாகத் தகவல்கள் வெளியாகியுள்ளன. சுமார் இரண்டு வாரங்களாக நீடித்து வந்த தற்காலிகப் போர்நிறுத்தத்திற்குப் பிறகு இந்த வெடிப்புகள் நிகழ்ந்துள்ளதால் பெரும் பதற்றம் ஏற்பட்டுள்ளது. பாகிஸ்தானில் நடைபெறவிருந்த அமைதிப் பேச்சுவார்த்தைகள் இழுபறியில் இருக்கும் நிலையில், அமெரிக்காவின் இந்த புதிய எச்சரிக்கையும் கூடுதல் போர்க்கப்பல்களின் வருகையும் மத்திய கிழக்கு ஆசியாவில் மீண்டும் ஒரு முழு அளவிலான போர் மூளும் அபாயத்தை ஏற்படுத்தியுள்ளது