“தங்க நகையை பார்த்து வந்த சலனம்”… 7.5 சவரன் நகைக்கு ஆசைப்பட்ட பெண்ணுக்கு கிடைத்த ‘மறக்க முடியாத பரிசு’….!

கோவை ரத்தினபுரி பகுதியில் உள்ள பரிசுப் பொருள் விற்பனை நிலையத்தில் நடைபெற்ற ஒரு துணிகர நகை பறிப்பு சம்பவம், தற்போது குற்றவாளிக்கு வழங்கப்பட்டுள்ள தண்டனையால் மீண்டும் கவனத்தைப் பெற்றுள்ளது. கடந்த 2022-ஆம் ஆண்டு, பிப்ரவரி 11-ம் தேதி மதியம், ரத்தினபுரி 7-வது வீதியில் உள்ள ஒரு கடையில் 60 வயதான செல்வராணி என்பவர் பணியில் இருந்தார். அப்போது கடைக்கு வந்த ஒரு பெண், பரிசுப் பொருட்களை வாங்குவது போல பாவனை செய்து இந்த அதிர்ச்சிகரமான சம்பவத்தை அரங்கேற்றியுள்ளார்.

மதுரை மேலூர் பகுதியைச் சேர்ந்த தெய்வநதி (36) என்ற அந்தப் பெண், இதய வடிவம் பொறித்த தேநீர் கோப்பைகளை (Tea Cups) காண்பிக்குமாறு செல்வராணியிடம் கேட்டுள்ளார். ஊழியர் செல்வராணி பொருட்களை எடுக்கத் திரும்பிய தருணத்தைப் பயன்படுத்திக் கொண்ட தெய்வநதி, தான் மறைத்து வைத்திருந்த கரப்பான் பூச்சி கொல்லி மருந்தை (Insecticide) திடீரென அவர் முகத்தில் பீய்ச்சி அடித்துள்ளார். இதனால் நிலைதடுமாறிய செல்வராணியின் கழுத்தில் இருந்த 7.5 சவரன் தங்க நகையை அவர் பறித்துக் கொண்டு தப்பிக்க முயன்றார்.

சம்பவம் நடந்த உடனே செல்வராணியின் அலறல் சத்தம் கேட்டு ஓடிவந்த அக்கம் பக்கத்தினர், தப்பியோட முயன்ற தெய்வநதியை மடக்கிப் பிடித்து காவல்துறையினரிடம் ஒப்படைத்தனர். ரத்தினபுரி போலீசார் வழக்குப்பதிவு செய்து அவரை கைது செய்தனர். இந்தச் சம்பவம் தொடர்பான வழக்கு கோவை 4-வது சார்பு நீதிமன்றத்தில் கடந்த நான்கு ஆண்டுகளாக நடைபெற்று வந்தது. இதில் பாதிக்கப்பட்டவர் தரப்பு சாட்சியங்கள் மற்றும் ஆதாரங்கள் முறையாக சமர்ப்பிக்கப்பட்டன.

வழக்கை விசாரித்த நீதிபதி விக்னேஷ் மது, குற்றச்சாட்டுகள் சந்தேகத்திற்கு இடமின்றி நிரூபிக்கப்பட்டதால், தெய்வநதிக்கு 7 ஆண்டுகள் சிறைத் தண்டனையும், 2000 ரூபாய் அபராதமும் விதித்து தீர்ப்பளித்தார். நகை பறிப்பு போன்ற குற்றங்களில் ஈடுபடும் பெண்களுக்கு இத்தகைய நீண்டகால சிறைத் தண்டனை வழங்கப்பட்டுள்ளது, குற்றச் செயல்களில் ஈடுபடுவோருக்கு ஒரு எச்சரிக்கையாகவும், பொதுமக்களுக்கு சட்டத்தின் மீதான நம்பிக்கையை அதிகரிப்பதாகவும் அமைந்துள்ளது.