“யாரும் எதிர்பார்க்காத திருப்பம்”… திமுக – அதிமுக ரகசிய கூட்டணி?… அமைச்சர் சிடிஆர் நிர்மல்குமார் அம்பலம்….!

தமிழக அரசியலில் அரை நூற்றாண்டு காலத்திற்கும் மேலாக நீடித்து வந்த திமுக – அதிமுக ஆகிய இரு துருவ அரசியலை உடைத்தெறிந்து, முதலமைச்சர் விஜய் தலைமையிலான தமிழக வெற்றிக் கழகம் புதிய ஆட்சியை அமைத்துள்ளது. தற்போதைய அரசியல் சூழலில், மாற்றுக்கட்சிகளைச் சேர்ந்த முக்கியப் பிரமுகர்களும், எம்.எல்.ஏ-க்களும் த.வெ.க-வை நோக்கி அணிவகுத்து வருவது பெரும் விவாதப் பொருளாகியுள்ளது. இந்நிலையில், மதுரையில் செய்தியாளர்களைச் சந்தித்த த.வெ.க பொதுச்செயலாளரும், அமைச்சருமான சி.டி.ஆர். நிர்மல்குமார், மாற்றுக்கட்சியினர் ஏன் தவெகவில் இணைகிறார்கள் என்பது குறித்து விரிவான விளக்கமளித்து திமுக மற்றும் அதிமுக ஆகிய இரு கட்சிகளையும் கடுமையாகச் சாடியுள்ளார்.

அதிமுக மற்றும் திமுக ஆகிய இரு கட்சிகளின் தற்போதைய நிலை குறித்துப் பேசிய அமைச்சர் சிடிஆர் நிர்மல்குமார், “அதிமுக என்ற கட்சி தற்போது உட்கட்சிப் பூசல்களால் நாளுக்கு நாள் பலவீனமடைந்து, முழுமையாகச் சரிந்து கொண்டிருக்கிறது. அக்கட்சியின் எம்.எல்.ஏ-க்களே அங்கிருக்க விரும்பாமல் தங்களின் அரசியல் எதிர்காலத்தைக் காப்பாற்றிக் கொள்ள தவெகவில் இணைந்து வருகின்றனர். அதேபோல், கடந்த கால திமுக அரசு மக்களுக்கு அளித்த வாக்குறுதிகளை நிறைவேற்றத் தவறி, தேர்தல் அறிக்கையில் சொன்ன பல திட்டங்களைச் செய்யாமல் மக்களை ஏமாற்றியுள்ளது. மக்கள் மத்தியில் ஏற்பட்ட அந்த ஏமாற்றமும், அதிருப்தியும்தான் த.வெ.க-வை அரியணையில் ஏற்றியுள்ளது” என்று குறிப்பிட்டார்.

மேலும், திமுக மற்றும் அதிமுக ஆகிய இரு கட்சிகளின் சுயநல அரசியலை விமர்சித்த அவர், “மு.க.ஸ்டாலினும், எடப்பாடி பழனிசாமியும் தங்களது குடும்பங்களைக் காப்பாற்றிக் கொள்ள ஆட்சிக்கு வர முயற்சிக்கின்றனர். தேர்தல் களத்தில் ஒருவருக்கொருவர் எதிராக இருந்துவிட்டு, தற்போது இருவரும் ஒன்று சேர நினைக்கிறார்கள்; தைரியம் இருந்தால் இதனை அவர்கள் வெளிப்படையாக அறிவிக்கட்டும். இப்படிப்பட்ட குறுக்கு வழி அரசியல் பிடிக்காமல்தான் இரு கட்சிகளின் தொண்டர்களும், நிர்வாகிகளும் தவெகவில் தங்களை இணைத்துக் கொள்கிறார்கள். இவர்கள் யாரும் உள்ளாட்சித் தேர்தலை மனதில் வைத்து வரவில்லை, மாறாக தூய்மையான அரசியலை விரும்பியே வருகிறார்கள்” என்று விவரித்தார்.

தவெகவின் கொள்கை பலம் மற்றும் நிர்வாகத் திறன் குறித்துப் பேசிய அமைச்சர், “சாதி, மத பேதமற்ற சமத்துவ அரசியலையும், மதச்சார்பற்ற சமூக நீதியையும் உள்ளடக்கிய ‘பிறப்பொக்கும் எல்லா உயிர்க்கும்’ என்ற தவெகவின் கொள்கை, மாற்றுக்கட்சியினருக்குப் பெரும் நம்பிக்கையைத் தந்துள்ளது. கடந்த காலங்களில் கூட்டணிக் கட்சிகளைப் பயன்படுத்தி ஆட்சிக்கு வந்தவர்கள் அவர்களுக்கு ஆட்சியில் பங்கு தர மறுத்த நிலையில், முதலமைச்சர் விஜய் தற்போதைய தவெக ஆட்சியில் கூட்டணிக் கட்சிகளுக்கும் அமைச்சரவையில் இடமளித்து உண்மையான கூட்டாட்சி தத்துவத்தை நிலைநாட்டியுள்ளார். மக்களின் எதிர்பார்ப்பைப் பூர்த்தி செய்யும் வகையில், மாற்றுக்கட்சிகளில் இருந்து வரும் நல்லவர்களையும் அரவணைத்து, ஊழலற்ற வெளிப்படையான நிர்வாகத்தின் மூலம் தமிழ்நாட்டை வளர்ச்சிப் பாதையில் கொண்டு செல்வதே முதலமைச்சர் விஜய்யின் இலக்கு” என உறுதியுடன் தெரிவித்தார்.