“மிரட்டலுக்கு அஞ்சமாட்டோம்!”… டிரம்பின் முகத்திலேயே 10 நிபந்தனைகளை வீசிய ஈரான்… பதற்றத்தில் அமெரிக்கா… இன்று இரவு போர் மூளுமா?…!!

மத்திய கிழக்கு பிராந்தியத்தில் நிலவும் போர் பதற்றத்தைத் தணிக்க பாகிஸ்தான் வழியாக அமெரிக்கா அனுப்பிய 15 அம்சத் திட்டத்தை ஈரான் திட்டவட்டமாக நிராகரித்துள்ளது. இந்தத் திட்டம் கள யதார்த்தத்திற்கு அப்பாற்பட்டது என்று விமர்சித்துள்ள ஈரான், அதற்குப் பதிலாகப் பகைமைகளுக்கு நிரந்தர முற்றுப்புள்ளி வைப்பதையும், பிராந்திய அமைதியையும் வலியுறுத்தும் 10 அம்சங்கள் கொண்ட புதிய சமாதானத் திட்டத்தை முன்வைத்துள்ளது. இதை ஒரு முக்கியமான நகர்வு என்று அமெரிக்க அதிபர் டொனால்ட் டிரம்ப் குறிப்பிட்டாலும், மோதலை முடிக்க இது மட்டுமே போதாது என்றும் கருத்துத் தெரிவித்துள்ளார்.

ஈரான் முன்வைத்துள்ள இந்த 10 அம்சத் திட்டத்தில், ஹார்முஸ் ஜலசந்தி வழியாகப் பாதுகாப்பான கப்பல் போக்குவரத்தை உறுதி செய்யும் புதிய அமைப்பை உருவாக்குதல் மற்றும் அணு ஆயுதப் பரவல் தடை ஒப்பந்தத்தின் (NPT) கீழ் தங்களின் யுரேனியம் செறிவூட்டும் உரிமையை அங்கீகரித்தல் போன்றவை முக்கிய இடம் பெற்றுள்ளன. மேலும், தங்கள் மீது விதிக்கப்பட்டுள்ள பொருளாதாரத் தடைகளை நீக்க வேண்டும் என்றும், லெபனானில் ஹிஸ்புல்லா அமைப்பினர் மீது இஸ்ரேல் நடத்தி வரும் தாக்குதல்களை நிறுத்த வேண்டும் என்றும் ஈரான் நிபந்தனை விதித்துள்ளது. தற்காலிகப் போர் நிறுத்தத்தை விடப் போருக்கு நிரந்தரத் தீர்வு காண்பதையே ஈரான் இலக்காகக் கொண்டுள்ளது.

ஹார்முஸ் ஜலசந்தி விவகாரத்தில் ஈரான் ஒரு நூதனமான முன்மொழிவைச் செய்துள்ளது. அதன்படி, அந்த முக்கிய கடல் பாதையில் மேற்கொண்டுள்ள முற்றுகையை நீக்கத் தயார் என்றும், ஆனால் அவ்வழியாகச் செல்லும் ஒவ்வொரு கப்பலுக்கும் 2 மில்லியன் டாலர் வரி விதிக்கப்படும் என்றும் தெரிவித்துள்ளது. இந்தத் தொகையை ஓமனுடன் பகிர்ந்து கொள்ளவும், அமெரிக்க மற்றும் இஸ்ரேலியத் தாக்குதல்களால் சேதமடைந்த தங்களது நாட்டின் உள்கட்டமைப்புகளை மீண்டும் கட்டியெழுப்ப இதைப் பயன்படுத்தவும் ஈரான் திட்டமிட்டுள்ளது. நேரடியாக இழப்பீடு கோருவதற்குப் பதிலாக, இந்த வரி வருவாய் மூலம் சேதங்களைச் சரிசெய்யலாம் என்பது ஈரானின் உத்தியாகத் தெரிகிறது.

அமெரிக்காவின் சமீபத்திய ஹெலிகாப்டர் மீட்பு நடவடிக்கை தோல்வியடைந்த சூழலில், டிரம்ப் தனது முந்தைய கடுமையான நிலைப்பாட்டைச் சற்றே தளர்த்தி காலக்கெடுவை நீட்டித்துள்ளார். இருப்பினும், ஈரானின் 10 அம்சத் திட்டத்தையும், அதன் கடினமான நிபந்தனைகளையும் டிரம்ப் ஏற்றுக்கொள்வாரா என்பது தற்போதைக்கு மர்மமாகவே உள்ளது. ஒருவேளை இந்த நிபந்தனைகளில் உடன்பாடு எட்டப்படாவிட்டால், டிரம்ப் ஏற்கனவே எச்சரித்தபடி இன்று இரவு பாரிய தாக்குதல்கள் தொடங்கக்கூடும் என்ற அச்சம் உலக நாடுகளிடையே நிலவுகிறது.