CINEMA
“என்னை மிரட்டினார்கள்.. விசித்ராவை 10 ரூம்களில் மாற்றி தங்க வைத்தேன்”.. 23 வருட சீக்ரெட்டை உடைத்த விசித்ராவின் கணவர்..
விஜய் டிவியில் ஒளிபரப்பாகி வரும் பிக்பாஸ் சீசன் 7 நிகழ்ச்சியில், ஒரு போட்டியாளராக நடிகை விசித்ரா பங்கேற்றுள்ளார். நேற்று முன்தினம் ஒரு டாஸ்க்கில் பேசிய விசித்ரா, 2001ம் ஆண்டில், கேரளா மலம்புழாவில் ஷூட்டிங் நடந்த போது ஒரு பிரபல நடிகர் தன்னை ரூமுக்கு வரச்சொன்னதாகவும், அவர் போகாததால், தங்கியிருந்த அறைக்கதவை கும்பலாக வந்து தட்டி மிரட்டியதாகவும் ஷூட்டிங் ஸ்பாட்டில், உடலில் பல இடங்களை கைவைத்த நபர்கள் குறித்து புகார் தெரிவித்ததால், ஸ்டண்ட் மாஸ்டர் கன்னத்தில் அறைந்ததாகவும் கூறியது, உடனடியாக டிரண்டிங் ஆனது. அந்த படம் 2001ல் எடுக்கப்பட்ட பலேவடிவி என்றும், ரூமுக்கு அழைத்தவர் தெலுங்கு நடிகர் பாலகிருஷ்ணா என்றும், கன்னத்தில் அறைந்தவர் ஸ்டண்ட் மாஸ்டர் ஏ.விஜய் என்றும் தகவல் பரவி, வைரலானது.
இதுகுறித்து சமீபத்திய நேர்காணலில் கேரளாவில் உள்ள விசித்ராவின் கணவர் ஷாஜி,கூறியதாவது, திருமணத்துக்கு பிறகு 2, 3 முறை தான் அதுபற்றி நாங்கள் இருவரும் பேசி இருப்போம். அதுபற்றி பேசினாலே, கண் கலங்கி விடுவார். அவரது மனதை காயப்படுத்திய விஷயம் என்பதால் நானும் அதை பற்றி பேச வேண்டாம் என்று சொல்லி விடுவேன். என் பசங்களுக்கு கூட இந்த விஷயம் இதுவரை தெரியாது. இப்போதுதான் தெரிந்துள்ளது. கல்லூரி செல்லும் என் மகன், இதுபற்றி ஏன் இதுவரை என்னிடம் சொல்லவில்லை என கேட்டான். இது சொல்ல வேண்டிய விஷயமல்ல, மறக்க வேண்டிய விஷயம் என்று சொன்னேன்.
இப்போதும் அந்த நடிகர், ஸ்டண்ட் மாஸ்டர் பற்றி சொல்ல முடியவில்லை. அது விசித்ராவின் பாதுகாப்பு கருதிதான். நடிகர் சங்கம், போலீஸ் ஸ்டேஷன் என எங்கு புகார் கூறியும் நடவடிக்கை இல்லை. சினிமாத்துறை நடிகர், நடிகைகளும் இதில் விசித்ராவுக்கு ஆதரவாக வரவில்லை. இந்த பிரச்னையை பெருசு பண்ணாதீங்க, அந்த படத்துல வேணா நடிக்காதீங்க என்பதுதான் பலரது அட்வைஸாக இருந்தது. விசித்ரா தங்கியிருந்த ஓட்டல் ஜெனரல் மேனேஜர் என்பதால், அவரது பாதுகாப்புக்காக ஒரு நாளில் 10 ரூம்களில் அவரை மாற்றி தங்க வைப்பேன். அதற்காக என்னையும் மிரட்டினார்கள். இது என் ஓட்டல். அவருக்கு பாதுகாப்பு தருவதுதான் என் கடமை, என்று அந்த நடிகரின் ஆட்களிடம் சொல்லி விட்டேன். பிறகு ஒரு கட்டத்தில், இருவரும் விரும்பி திருமணம் செய்துக்கொண்டோம், என கூறியிருக்கிறார் விசித்ராவின் கணவர் ஷாஜி.