தமிழக அரசியலில் தமிழக வெற்றிக் கழகத்தின் தலைவர் விஜய் மற்றும் அதிமுக இடையே கருத்து மோதல் வலுத்து வருகிறது. சமீபத்தில் நடைபெற்ற கட்சியின் செயற்குழு கூட்டத்தில், அதிமுகவை ஊழல் சக்தி என்றும் பாஜகவின் அடிமை என்றும் விஜய் விமர்சித்திருந்தார். விஜய்யின் இந்த அதிரடி பேச்சு அதிமுக வட்டாரத்தில் பெரும் கொந்தளிப்பை ஏற்படுத்திய நிலையில், அக்கட்சியின் முக்கிய நிர்வாகிகள் விஜய்க்கு எதிராகக் கடுமையான விமர்சனங்களை முன்வைத்து வருகின்றனர்.
இதற்குப் பதிலடி கொடுக்கும் வகையில் பேசிய முன்னாள் அமைச்சர் ஜெயக்குமார், “அதிமுகவை தொட்டால் விஜய் கெட்டார்” என்று மிகக் காட்டமாக எச்சரித்துள்ளார். விஜய் வரி ஏய்ப்பு புகாரில் சிக்கியுள்ளதைச் சுட்டிக்காட்டிய அவர், பல கோடி ரூபாய் வரி ஏய்ப்பு செய்பவர்கள் ஊழலைப் பற்றிப் பேச எந்தத் தகுதியும் இல்லை என்று சாடினார். மேலும், சினிமா டிக்கெட்டுகளை சட்டவிரோதமாக கள்ளச் சந்தையில் விற்பனை செய்து லாபம் ஈட்டும் நபர்கள் ஊழல்வாதிகள் தான் என்றும் அவர் குற்றம் சாட்டினார்.
தமிழக வெற்றிக் கழகத்திற்கு ‘விசில்’ சின்னம் ஒதுக்கப்பட்டிருப்பது குறித்தும் ஜெயக்குமார் கிண்டலாகப் பேசினார். பொதுவாக ஆபத்தில் இருப்பவர்கள் தான் தங்களைக் காப்பாற்றிக் கொள்ள விசில் அடிப்பார்கள் என்று குறிப்பிட்ட அவர், விஜய் அரசியலில் தப்பிப் பிழைக்கப் போராடுவதையே இது காட்டுவதாகக் கூறினார். விஜய்யின் அரசியல் வருகை அதிமுகவுக்கு எந்த பாதிப்பையும் ஏற்படுத்தாது என்றும், வரும் தேர்தலில் போட்டி என்பது அதிமுக மற்றும் திமுக இடையே தான் இருக்கும் என்றும் அவர் திட்டவட்டமாகத் தெரிவித்தார்.
மேலும், தன்னை முன்னாள் முதலமைச்சர் எம்.ஜி.ஆருடன் ஒப்பிட்டு விஜய் பேசுவதற்கும் ஜெயக்குமார் கடும் கண்டனம் தெரிவித்தார். எம்.ஜி.ஆர் விளம்பரத்திற்காகவோ அல்லது அரசியல் லாபத்திற்காகவோ உதவி செய்யவில்லை என்றும், அவர் சுயநலமற்ற மக்கள் தலைவர் என்றும் கூறினார். வரி ஏய்ப்பு வழக்குகளை எதிர்கொள்ளும் ஒரு நடிகர், புரட்சித் தலைவருடன் தன்னை ஒப்பிடுவது ஏற்புடையதல்ல என்றும், தனது வாழ்நாள் முழுவதும் அதிமுகவிலேயே நீடிக்கப் போவதாகவும் ஜெயக்குமார் உறுதியாகத் தெரிவித்துள்ளார்.