ஸ்டாலின் பாணியை கையில் எடுத்த முதல்வர் விஜய்…. சென்னையே மொத்தமா மாறப்போகுது… தமிழக அரசின் அதிரடி ஆக்ஷன்….!

தமிழ்நாட்டில் சாதிப் பாகுபாடுகளைக் களைவதற்கும் சமூக நீதியைச் சுடரச் செய்வதற்கும், பொது உள்கட்டமைப்புகளில் உள்ள சாதிப் பெயர்களை அகற்றுவது மிக முக்கியமான முயற்சியாகப் பார்க்கப்படுகிறது. முன்னதாக இதற்காக நகராட்சி நிர்வாகம் மற்றும் குடிநீர் வழங்கல் துறை மூலம் ‘அரசாணை 313’ (GO 313) வெளியிடப்பட்டு வழிகாட்டுதல்கள் வழங்கப்பட்டன. அதன்படிக் கிராமங்கள், குடியிருப்புகள், சாலைகள், தெருக்கள் மற்றும் நீர்நிலைகளில் உள்ள ஆதி திராவிடர் காலனி, ஹரிஜன் குடியிருப்பு, வண்ணான்குளம், பறையர் காலனி போன்ற பாகுபாட்டை வெளிப்படுத்தும் பெயர்களை அகற்றும் பணி முந்தைய அரசின் தொடர்ச்சியாக, தற்போதைய தவெக ஆட்சிக் காலத்திலும் வேகம் பெற்றுள்ளது.

இத்திட்டத்தின் ஒரு பகுதியாக, சென்னை மாநகராட்சி எல்லைக்குட்பட்ட பகுதிகளில் உள்ள சாதிப் பெயர் கொண்ட தெருக்களைக் கணக்கெடுக்கும் பணிகள் தீவிரமடைந்துள்ளன. சமூக நீதித் துறை அமைச்சகத்தின் அறிவுறுத்தலின்படி, மாநகராட்சி அதிகாரிகள் மண்டல வாரியாகத் தெருக்களை ஆய்வு செய்து அறிக்கை சமர்ப்பித்து வருகின்றனர். முதல் கட்ட ஆய்வில் கோடம்பாக்கம், வளசரவாக்கம் மற்றும் அடையாறு ஆகிய மண்டலங்களில் மட்டும் சாதிப் பெயர்களுடன் அமைந்த சுமார் 77 தெருப் பெயர்கள் அடையாளம் காணப்பட்டுள்ளன. மீதமுள்ள மண்டலங்களிலும் இந்தக் கணக்கெடுப்புப் பணி தொடர்ந்து நடைபெற்று வருகிறது.

அரசாணையின் வழிகாட்டுதலின்படி, ஒரு தெருவின் பெயரில் சாதியின் பெயர் பின்னொட்டாக இணைக்கப்பட்டிருந்தால் அந்தப் பகுதி மட்டும் நீக்கப்படும்; மாறாக, தெருவின் முழுப் பெயருமே சாதியை மையமாகக் கொண்டு அமைந்திருந்தால் அப்பெயர் முழுமையாக மாற்றப்படும். உதாரணமாக, ‘ஜி.என்.செட்டி சாலை’ என்பது ‘கோபதி நாராயணன் சாலை’ என ஏற்கனவே மாற்றம் செய்யப்பட்டுள்ளது. அதேபோல், மேற்கு மாம்பலத்தில் உள்ள சீனிவாச ஐயர் தெரு மற்றும் பாலகிருஷ்ண நாயக்கன் தெரு ஆகியவை முறையே ‘சீனிவாச (ஐ) தெரு’, ‘பாலகிருஷ்ண (நா) தெரு’ எனச் சுருக்கப்பட்டுள்ளன. தற்போது கெங்கு ரெட்டி சாலை, பிராமணர் தெரு, வன்னியர் தெரு மற்றும் டாக்டர் நாயர் சாலை உள்ளிட்ட பல இடங்கள் இந்த ஆய்வின் கீழ் கொண்டுவரப்பட்டுள்ளன.

சென்னை மாநகராட்சியின் இந்த நடவடிக்கை குறித்து தமிழ்நாடு தீண்டாமை ஒழிப்பு முன்னணி வரவேற்பு தெரிவித்துள்ளது. நாட்டின் பிற மாநிலங்களை விடச் சமூக நீதியில் சிறந்து விளங்கும் தமிழ்நாட்டில் மேற்கொள்ளப்படும் இந்த முயற்சி பாராட்டுக்குரியது என்றும், அதேநேரத்தில் பெயர் மாற்றத்தின் போது சமூக நீதிக்காகப் பாடுபட்ட டாக்டர் பி.ஆர்.அம்பேத்கர், எம்.சிங்காரவேலர் போன்ற தலைவர்களின் பெயர்களைச் சேர்க்க அரசு முன்வர வேண்டும் என்றும் கோரிக்கை விடுக்கப்பட்டுள்ளது. விரைவில் முதலமைச்சர் தலைமையில் நடைபெறவுள்ள மாநில அளவிலான விழிப்புணர்வு மற்றும் கண்காணிப்புக் குழுக் கூட்டத்தில் இத்திட்டத்தின் அடுத்தகட்ட முன்னேற்றங்கள் குறித்து ஆய்வு செய்யப்பட உள்ளது.