தமிழகத்தில் சட்டமன்ற தேர்தலுக்கு இன்னும் ஓராண்டு மட்டுமே உள்ளதால் தேர்தல் களம் இப்போதே அனல் பறக்க தொடங்கிவிட்டது. 2026 சட்டமன்ற தேர்தலில் பலமுனை போட்டி ஏற்படும் சூழல் ஏற்பட்டுள்ளது. திமுக கூட்டணி ஒரு பக்கம் வலுவாக உள்ளது. மற்றொரு பக்கம் எதிர்க்கட்சியான அதிமுக மீண்டும் பாஜகவுடன் கூட்டணி அமைத்துள்ளது. அரசியலுக்கு புதிதாக என்ட்ரி கொடுத்துள்ள நடிகர் விஜய் தலைமையிலான தமிழக வெற்றி கழகம் தனித்து களமிறங்கவே அதிக வாய்ப்புள்ளதாக தெரிகின்றது. வழக்கம்போல சீமானின் நாம் தமிழர் கட்சி தனித்துப் போட்டியிடவே அதிக வாய்ப்புள்ளது.
இதனிடையே சமீபத்தில் அதிமுக தமிழக வெற்றி கழகம் கட்சியுடன் கூட்டணி அமைக்கப் போவதாக தகவல் வெளியான நிலையில் அந்தச் செய்தி தான் தற்போது ஹாட் டாப்பிக்காக உள்ளது. இரண்டு கட்சிகள் இடையே பேச்சுவார்த்தை நடந்து வருவதாகவும் கூறப்படும் நிலையில் தங்களுடைய நிரந்தர எதிரியான பாஜகவோடு கூட்டணியில் இருக்கும் எந்த கட்சியையும் சேர்க்க மாட்டோம் என்று தமிழக வெற்றிக்கலகம் கொள்கை பரப்பு செயலாளர் ராஜ்மோகன் விளக்கமளித்துள்ளார். செயற்குழு தீர்மானத்தின்படி விஜய் தான் முதல்வர் வேட்பாளர் என்றும் அவர் திட்டவட்டமாக குறிப்பிட்டார். பாஜகவுடன் கூட்டணி ஆட்சி தமிழகத்தில் அமைவதற்கு அனுமதிக்காத இபிஎஸ் முதல்வர் வேட்பாளர் தான்தான் என்று கூறிக் கொண்டிருக்கும் நிலையில் விஜய்யின் விதிமுறைகளுக்கு எல்லாம் கட்டுப்பட்டு கூட்டணி அமைப்பாரா என்பது சந்தேகம்தான்.