“ஆசிரியை வீட்டில் 36 சவரன் அவுட்”…. ரகசியமாக ரவுண்ட் அடித்த காதல் தம்பதி… இறுதியில் காத்திருந்த பேரதிர்ச்சி…!

வேலூர் மாவட்டம் காட்பாடி அருகே உள்ள கிறிஸ்டியான்பேட்டையைச் சேர்ந்தவர் ஓய்வு பெற்ற அரசுப் பள்ளி ஆசிரியை மரியா (63). இவர் தனது கணவர் ராஜ்குமாருடன் கடந்த ஆகஸ்ட் 27-ஆம் தேதி ஆற்காட்டில் உள்ள பாதிரியார் ஒருவரைப் பார்க்கச் சென்றுள்ளார். இரவு 11 மணியளவில் வீட்டிற்குத் திரும்பியபோது, முன்பக்க இரும்புக் கதவின் பூட்டு உடைக்கப்பட்டு இருந்ததைக் கண்டு அதிர்ச்சியடைந்தனர். உள்ளே சென்று பார்த்தபோது, பீரோவில் வைக்கப்பட்டிருந்த ஆரம், நெக்லஸ், வளையல் உட்பட மொத்தம் 36 சவரன் தங்க நகைகள் கொள்ளையடிக்கப்பட்டிருந்தது தெரியவந்தது.

இதுகுறித்து மரியா அளித்த புகாரின் பேரில் காட்பாடி போலீசார் வழக்குப் பதிவு செய்து விசாரணையைத் தொடங்கினர். காட்பாடி டிஎஸ்பி விஜிகுமார் தலைமையில் 4 தனிப்படைகள் அமைக்கப்பட்டு, சென்னை, பெங்களூரு, சித்தூர் உள்ளிட்ட பல்வேறு இடங்களில் தீவிர தேடுதல் வேட்டை நடத்தப்பட்டது. அப்பகுதியில் உள்ள சிசிடிவி காட்சிகளை ஆய்வு செய்தபோது, ஒரு வாலிபரும் பெண்ணும் மெயின் ரோட்டிற்குச் சென்று, பேருந்து நிறுத்தியத்தில் இருந்து சித்தூர் செல்லும் பேருந்தில் ஏறியது தெரியவந்தது.

இதையடுத்து, சித்தூர் சென்று அங்குள்ள காவல்துறை உதவியுடன் சிசிடிவி காட்சிகளை ஆய்வு செய்து, ஒரு வீட்டில் பதுங்கியிருந்த அந்த ஜோடியைப் போலீசார் சுற்றிவளைத்துக் கைது செய்தனர். விசாரணையில், அவர்கள் விருதுநகரைச் சேர்ந்த முத்துவேல் கார்த்திக் (32) மற்றும் அவரது மனைவி பிரபாவதி (30) என்பதும், இருவரும் காதல் திருமணம் செய்து கொண்டவர்கள் என்பதும் தெரியவந்தது. இவர்கள் வெளியூர்களுக்குச் சென்று வாடகைக்கு வீடு எடுத்து தங்கி, அப்பகுதிகளில் தொடர் திருட்டில் ஈடுபட்டு வந்ததை ஒப்புக் கொண்டனர்.

திருடிய நகைகளை உடனடியாக விற்று, அதில் கிடைக்கும் பணத்தைக் கொண்டு சொகுசு வாழ்க்கை வாழ்வதை வழக்கமாகக் கொண்டிருந்த இந்தத் தம்பதியிடம் இருந்து 26 சவரன் தங்க நகைகள் மற்றும் திருட்டுப் பணத்தில் வாங்கப்பட்ட கார் ஆகியவை பறிமுதல் செய்யப்பட்டன. கைது செய்யப்பட்ட கணவன்-மனைவி இருவரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர். CCTV காட்சிகளின் உதவியால் இந்தத் தொடர் திருட்டு தம்பதி உடனடியாகச் சிக்கியது அப்பகுதியில் பெரும் பரபரப்பை ஏற்படுத்தியுள்ளது.