“செருப்பால அடிக்கணும்”…. விவசாயிகள் முன்னாடியே பாஜக MLA-வை அலறவிட்ட காங்கிரஸ் அமைச்சர்….. கர்நாடகாவில் பெரும் பதற்றம்….!

கர்நாடகாவில் பத்ரா நீர்த்தேக்கத்திலிருந்து விவசாயத்திற்குத் தண்ணீர் திறந்துவிடக்கோரி முறையிட வந்த விவசாயிகளிடம், அம்மாநில அமைச்சர் எஸ்.எஸ். மல்லிகார்ஜுன் நாகரிகமற்ற முறையில் பேசிய செய்தி வெளியாகி பெரும் அரசியல் புயலைக் கிளப்பியுள்ளது. தங்களைச் சந்திக்க பாஜக எம்.எல்.ஏ பி.பி. ஹரீஷ் அறிவுறுத்தியதாக விவசாயிகள் கூறியதால் ஆத்திரமடைந்த அமைச்சர், சம்பந்தப்பட்ட எம்.எல்.ஏ-வை மிகக் கடுமையான அவதூறு வார்த்தைகளால் திட்டியதுடன், அவரைச் செருப்பால் அடிக்க வேண்டும் என்றும் ஆக்ரோஷமாகப் பேசியுள்ளார். அமைச்சர் மல்லிகார்ஜுனின் இந்தத் தரக்குறைவான பேச்சு அடங்கிய வீடியோ சமூக வலைதளங்களில் வேகமாகப் பரவி, மாநிலம் முழுவதும் கடும் கொந்தளிப்பை ஏற்படுத்தியுள்ளது.

அமைச்சரின் இந்த வரம்பு மீறிய பேச்சிற்குப் பாதிக்கப்பட்ட பாஜக எம்.எல்.ஏ பி.பி. ஹரீஷ் தனது வன்மையான கண்டனத்தைப் பதிவு செய்துள்ளார். “விவசாயிகளின் நியாயமான பாசனத் தேவையைத் தீர்க்க நடவடிக்கை எடுக்காமல், மக்கள் பிரதிநிதியையும் விவசாயிகளையும் இதுபோன்று அநாகரிகமாக நடத்துவது ஏற்றுக்கொள்ள முடியாத ஒன்று” என்று அவர் சாடியுள்ளார். மேலும், அதிகார மமதையில் ஆடும் அமைச்சரின் இந்த மக்கள் விரோதச் செயலுக்குக் கர்நாடக பொதுமக்கள் விரைவிலேயே தகுந்த பாடம் புகட்டுவார்கள் என்றும் அவர் காட்டமாக எச்சரித்துள்ளார்.

இப்பிரச்சனை குறித்துக் கர்நாடக மாநில பாஜக தலைவர் பி.ஒய். விஜயேந்திரா தெரிவிக்கையில், அமைச்சரின் மிரட்டல் தொனியும் அருவருப்பான வார்த்தைகளும் ஒரு தனிப்பட்ட எம்.எல்.ஏ-வை மட்டுமல்லாமல், அவரைத் தேர்ந்தெடுத்த தொகுதி மக்கள் அனைவரையும் அவமதிக்கும் செயலாகும் என்று விமர்சித்துள்ளார். ஆட்சிப் பொறுப்பில் இருப்பவர்கள் தங்களின் கண்ணியத்தை மறந்து இதுபோன்று நடந்துகொண்டால், மக்கள் மன்றத்தில் அதற்கான உரிய பதிலடியைச் சந்திக்க நேரிடும் என்றும் அவர் எச்சரித்துள்ளார். இந்த விவகாரம் கர்நாடக அரசியலில் ஆளும் காங்கிரஸ் அரசுக்குக் கடும் நெருக்கடியை உருவாக்கியுள்ளது.