அதிமுகவின் மூத்த தலைவராகவும், அக்கட்சியின் முக்கியத் தூணாகவும் விளங்கிய கே.ஏ. செங்கோட்டையன், கட்சியை ஒன்றிணைக்கும் முயற்சியில் ஈடுபட்டு வந்த நிலையில் அதிரடியாக நீக்கப்பட்டார். இதனையடுத்து, அவர் தமிழக வெற்றி கழகத்தின் (தவெக) தலைவர் விஜய் முன்னிலையில் அந்தப் புதிய கட்சியில் இணைந்தார். பல தசாப்த கால அரசியல் அனுபவம் கொண்ட செங்கோட்டையனின் இந்தத் திடீர் அரசியல் மாற்றம் தமிழக அரசியலில் பெரும் விவாதத்தை ஏற்படுத்தியுள்ளது.
இந்நிலையில், கோவையில் இன்று செய்தியாளர்களைச் சந்தித்த பாஜக எம்.எல்.ஏ வானதி சீனிவாசன், செங்கோட்டையனின் இந்த முடிவு குறித்து தனது அதிருப்தியைத் தெரிவித்தார். “செங்கோட்டையன் ஒரு முதிர்ந்த மற்றும் அனுபவம் வாய்ந்த அரசியல்வாதி; ஆனால், காலத்தின் கொடுமை காரணமாக இப்போதுதான் கட்சி தொடங்கியுள்ள ஒரு நடிகரோடு அவர் கைகோர்த்திருப்பது வேதனையாக இருக்கிறது” என அவர் விமர்சித்துள்ளார். நீண்ட கால அரசியல் ஆளுமைகள் புதிய அரசியல் சக்திகளுடன் இணைவது அரசியல் வட்டாரத்தில் வியப்பாகப் பார்க்கப்படுகிறது.