எழுத மாட்டேன் என்று சொன்னார் வைரமுத்து… அந்த பாடலுக்குதான் தேசிய விருது கிடைத்தது… ஓப்பனாக சொன்ன இசையமைப்பாளர்!

1980 ஆம் ஆண்டு நிழல்கள் திரைப்படத்தில் இடம்பெற்ற இது ஒரு பொன்மாலைப் பொழுது என்ற பாடலின் மூலம் அறிமுகம் ஆனவர் வைரமுத்து. அப்போது இளையராஜாவுக்கும் அவருக்கும் இடையிலான நட்பு அதிகமாகி அடுத்தடுத்த ஆண்டுகளில் இளையராஜா இசையில் அதிக பாடல்கள் எழுதியவராக இருந்தார். ஆனால் இந்த கூட்டணி ஒரு கட்டத்தில் பிரிந்தது.

அதற்குக் காரணம் இருவருக்கும் இடையிலான படைப்பு ரீதியிலான கருத்து வேறுபாடுதான் என்று சொல்லப்படுகிறது. அதன் பிறகு 35 ஆண்டுகளாக சினிமாவில் பணியாற்றி வந்தாலும் இணைந்து ஒரே ஒரு பாடல் கூட பணியாற்றவில்லை. பலரும் அவர்களை சேர்த்து வைக்க முயற்சி செய்த போதும் அது நடக்கவில்லை.

ஆனாலும் ரஹ்மானின் வருகைக்குப் பிறகு வைரமுத்து தனது செகண்ட் இன்னிங்ஸை வெற்றிகரமாக தொடங்கி இப்போது வரை முன்னணி பாடல் ஆசிரியராக இருக்கிறார். ஆனால் அவர் இத்தனை ஆண்டுகள் சேர்த்து வைத்த புகழை அவர் மீதான பாலியல் குற்றச்சாட்டுகள் ஒரே நாளில் வீழ்த்திவிட்டன. முதலில் அவர் மீது இந்தக் குற்றச்சாட்டை வைத்தவர் பாடகி சின்மயிதான். அவர் தொடர்ந்து வைரமுத்துவின் அத்துமீறல்களைப் பட்டியலிட்டு அவரால் பல பெண்கள் பாதிக்கப்பட்டுள்ளதாக சொல்லிவந்தார். இதனால் வைரமுத்து சினிமாவில் பாடல்கள் எழுதும் வாய்ப்புகளை இழந்துள்ளார்.

இந்திய சினிமாவிலேயே பாடல்களுக்காக அதிக தேசிய விருதைப் பெற்றிருப்பவர் வைரமுத்துதான். மொத்தம் 7 தேசிய விருதுகளைப் பெற்றுள்ளார். அப்படி அவர் தேசிய விருது பெற்ற படங்களில் ஒன்றுதான் தென்மேற்குப் பருவக்காற்று. அந்த படத்தில் இடம்பெற்ற ‘கள்ளிக்காட்டில் பிறந்த தாயே’ என்ற பாடலுக்காக தேசிய விருது கிடைத்தது.

இதுபற்றி அந்த படத்தின் இசையமைப்பாளர் ரகுநந்தன் ஒரு சுவாரஸ்யமான சம்பவத்தைப் பகிர்ந்துள்ளார். அதில் “நாங்கள் தென்மேற்குப் பருவக்காற்று படத்துக்கு மெட்டமைத்து அதற்காக பாடல்கள் வாங்க வைரமுத்து அவர்களிடம் சென்றபோது எங்களைப் பார்க்க மறுத்துவிட்டார்கள். அப்போது வைரமுத்து சார் ரஹ்மான் போன்ற பெரிய இசையமைப்பாளர்களுக்கு மட்டும்தான் பாடல் எழுதி வந்தார்.

ஆனால் நாங்கள் காத்திருந்து கெஞ்சி அவரை சம்மதிக்க வைத்தோம். ஒரு வாரம் கழித்து அவர் அனைத்துப் பாடல்களையும் எழுதித் தந்தார். அப்படி அவர் எழுதிய பாடலுக்குதான் தேசிய விருது கிடைத்தது” எனக் கூறியுள்ளார்.