“அவருக்கு நினைவு இல்லை”…. கண்கலங்கிய வைகோ…. தமிழகமே பிரார்த்திக்கும் அந்த ஒரு நிமிடம்….!

சென்னையில் உள்ள ராஜீவ் காந்தி அரசு பொது மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ள இந்திய கம்யூனிஸ்ட் கட்சியின் மூத்த தலைவர் நல்லகண்ணு அவர்களின் உடல்நிலை குறித்து மதிமுக பொதுச்செயலாளர் வைகோ நேரில் சென்று கேட்டறிந்தார். பின்னர் செய்தியாளர்களை சந்தித்த அவர், தற்போது நல்லகண்ணு அவர்களுக்கு நினைவு இல்லை என்றும், அரசு மருத்துவர்கள் அவருக்குத் தேவையான தகுந்த சிகிச்சைகளை வழங்கி வருவதாகவும் தெரிவித்தார். ஜாதி, மதங்களுக்கு அப்பாற்பட்டு, மனிதநேயத்தோடும், நேர்மையோடும் பொதுவாழ்வில் ஈடு இணையற்ற சேவையாற்றிய அவர், கடந்த காலங்களைப் போலவே இப்போதும் உடல்நலம் தேறி மீண்டு வருவார் என வைகோ நம்பிக்கை தெரிவித்தார்.

பொதுவுடைமை இயக்கத்திற்காகத் தன் வாழ்நாளை அர்ப்பணித்த நல்லகண்ணு அவர்களின் எளிமையையும், போராட்டக் குணத்தையும் வைகோ வெகுவாகப் புகழ்ந்து பேசினார். இளம் வயதிலேயே தங்களை இயக்கத்தில் இணைத்துக் கொண்டு, பல ஆண்டுகள் சிறைவாசம் மற்றும் தலைமறைவு வாழ்க்கையை எதிர்கொண்டவர் நல்லகண்ணு. தொழிலாளர் வர்க்கத்தின் உரிமைக்காகவும், சமூக நீதிக்காகவும் அயராது உழைத்த அவர், மாற்றுக்கட்சியினரும் மதிக்கத்தக்க ஒரு முன்மாதிரித் தலைவராக விளங்குவதாக வைகோ குறிப்பிட்டார். குறிப்பாக, எந்தவொரு புத்தக வெளியீட்டு விழாவிற்குச் சென்றாலும் அந்தப் புத்தகத்தை முழுமையாகப் படித்த பின்னரே உரையாற்றும் அவரது ஆழ்ந்த வாசிப்புப் பழக்கத்தை மற்றவர்கள் கற்றுக்கொள்ள வேண்டிய பாடமாக அவர் சுட்டிக்காட்டினார்.