“ராஜ்ய சபா + 12 தொகுதிகள்”… 2026-ல் ஸ்டாலினிடம் வைகோ கேட்கப்போகும் ‘மெகா’ லிஸ்ட்… ஷாக் ஆன அறிவாலயம்..!

2026 தமிழகச் சட்டமன்றத் தேர்தல் நெருங்கி வரும் வேளையில், மதிமுக தனது தேர்தல் பணிகளைத் தீவிரப்படுத்தியுள்ளது. குறிப்பாக, கட்சியின் முதன்மைச் செயலாளரும் நாடாளுமன்ற உறுப்பினருமான துரை வைகோ, மாநில அந்தஸ்தைப் பெறும் நோக்கில் கட்சிக்குச் சாதகமான 12 தொகுதிகளைத் தனியார் ஆய்வின் மூலம் அடையாளம் கண்டுள்ளார். திமுக கூட்டணியில் அங்கம் வகிக்கும் மதிமுக, இம்முறை கூடுதல் தொகுதிகளைப் பெற்று வலுவான வெற்றியைப் பதிவு செய்யத் திட்டமிட்டுள்ளது.

இந்த ஆய்வின் அடிப்படையில் வாசுதேவநல்லூர், மதுரை தெற்கு, திருநெல்வேலி, தூத்துக்குடி, திருச்சி கிழக்கு, மணப்பாறை, கும்பகோணம், பாபநாசம், மயிலாடுதுறை மற்றும் செங்கல்பட்டு உள்ளிட்ட 12 தொகுதிகள் ம.தி.மு.க.வுக்கு வெற்றி வாய்ப்புள்ள இடங்களாகக் கருதப்படுகின்றன. கடந்த தேர்தலில் போட்டியிட்ட மதுரை தெற்கு மற்றும் வாசுதேவநல்லூர் போன்ற தொகுதிகளுடன், துரை வைகோ எம்.பி.யாக இருக்கும் திருச்சி மண்டலத்திலும் கூடுதல் தொகுதிகளைக் கைப்பற்ற அக்கட்சி ஆர்வம் காட்டி வருகிறது.

திமுக கூட்டணியில் தொகுதிப் பங்கீட்டுப் பேச்சுவார்த்தை விரைவில் தொடங்க உள்ள நிலையில், இந்த 12 தொகுதிகள் குறித்த விவரங்களை முன்வைத்து வைகோ பேச்சுவார்த்தை நடத்துவார் என எதிர்பார்க்கப்படுகிறது. ஒருவேளை திமுக குறைந்த எண்ணிக்கையிலான தொகுதிகளை ஒதுக்க முன்வந்தால், ஈடாக வைகோவுக்கு மாநிலங்களவை உறுப்பினர் பதவியை வலியுறுத்தவும் அக்கட்சித் தலைமை ஆலோசித்து வருகிறது. முன்னதாக, கமல்ஹாசனுக்கு மாநிலங்களவை பதவி வழங்கப்பட்ட நிலையில், ம.தி.மு.க. இம்முறை தனது உரிமையை விட்டுக் கொடுக்கத் தயாராக இல்லை எனத் தெரிகிறது.

மறுபுறம், ம.தி.மு.க. தனிச் சின்னத்தில் போட்டியிட வேண்டும் என்பதில் துரை வைகோ உறுதியாக இருக்கிறார். அவ்வாறு தனிச் சின்னத்தில் போட்டியிடும் பட்சத்தில், திமுக வழங்கும் தொகுதிகளின் எண்ணிக்கை குறைய வாய்ப்புள்ளதாக அரசியல் வட்டாரங்கள் தெரிவிக்கின்றன. எதுவாக இருப்பினும், அடையாளம் காணப்பட்ட 12 தொகுதிகளில் குறைந்தது இரட்டை இலக்க எண்ணிக்கையிலான இடங்களைப் பெற்று, சட்டமன்றத்தில் ம.தி.மு.க.வின் பிரதிநிதித்துவத்தை அதிகரிக்க வேண்டும் என்பதே அக்கட்சியின் தற்போதைய முக்கிய இலக்காகும்.