“உன்னைப்போல் ஆயிரம் பேரை பார்ப்பேன்… 7 மாத கர்ப்பிணி மனைவி சொன்ன ‘அந்த’ வார்த்தை… கணவனின் ஆயுள் தண்டனையைக் குறைத்த நீதிமன்றம்…!”

மத்திய பிரதேசத்தில் 7 மாத கர்ப்பிணி மனைவியை கொலை செய்த கணவருக்கு விசாரணை நீதிமன்றம் விதித்த ஆயுள் தண்டனையை, ஜபல்பூர் உயர்நீதிமன்றம் 10 ஆண்டுகள் கடுங்காவல் தண்டனையாகக் குறைத்து தீர்ப்பளித்துள்ளது. சிந்த்வாரா மாவட்ட விசாரணை நீதிமன்றத்தில் நடைபெற்று வந்த இந்த வழக்கில், மனைவியைக் கொலை செய்த குற்றத்திற்காக கணவர் ஷிவா என்பவருக்கு ஆயுள் தண்டனை விதிக்கப்பட்டிருந்தது. இதனை எதிர்த்து அவர் மேல்முறையீடு செய்ததை அடுத்து, இந்த வழக்கின் பின்னணியை உயர்நீதிமன்றம் விரிவாக ஆராய்ந்தது.

வழக்கின் விசாரணையின் போது, கணவன்-மனைவி இருவருக்கும் இடையே கடுமையான வார்த்தை தகராறு ஏற்பட்டது தெரியவந்தது. அப்போது மனைவி, “உன்னைப் போன்று ஆயிரம் கணவர்களை என்னால் வைத்துக் கொள்ள முடியும்” என்று கூறியுள்ளார். மனைவியின் இந்த வார்த்தைகள் கணவருக்கு கடுமையான மற்றும் திடீர் ஆத்திரமூட்டலை ஏற்படுத்தியதாகவும், அந்தத் தற்காலிக கோபத்தின் உச்சக்கட்டத்திலேயே அவர் மனைவியைக் கொலை செய்தார் என்றும் அவரது தரப்பு வழக்கறிஞர் நீதிமன்றத்தில் வாதிட்டார்.

இந்த வாதத்தை ஏற்றுக்கொண்ட உயர்நீதிமன்றம், மனைவியின் அந்தப் பேச்சு கணவரைத் தூண்டும் விதமாக அமைந்ததால், இது திட்டமிட்ட கொலை அல்ல என்று கருதியது. கடுமையான மற்றும் திடீர் ஆத்திரமூட்டலால் ஏற்படும் மரணங்கள் குறித்துப் பேசும் இந்திய தண்டனைச் சட்டத்தின் (IPC) பிரிவு 300-ன் விதிவிலக்கு 1-ன் கீழ் இக்குற்றம் வருவதாகக் குறிப்பிட்ட நீதிபதிகள், ஆயுள் தண்டனையை 10 ஆண்டுகள் சிறைத்தண்டனையாகக் குறைத்து உத்தரவிட்டனர்.