“இனி எனக்கு பிறந்தநாளே வேண்டாம்… யாருக்கும் தெரியாமல் எங்காவது ஓடிப் போய் ஒளிந்துகொள்கிறேன்”…. மேடையில் உடைந்து அழுத வைகோ….!

மதிமுக பொதுச்செயலாளர் வைகோ, தனது பிறந்த நாள் விழாக்களை இனிவரும் காலங்களில் ரத்து செய்வதாக அதிரடியாகவும் உருக்கமாகவும் அறிவித்துள்ளார். தொண்டர்கள் தனக்குத் தெரியாமல் பிறந்த நாள் விழாவிற்கான ஏற்பாடுகளைச் செய்து வருவதை அறிந்த அவர், அவர்களுக்கு வீண் பொருட்செலவும் பொருளாதார நெருக்கடியும் ஏற்படுவதை விரும்பவில்லை எனக் குறிப்பிட்டுள்ளார். அண்ணாவின் பிறந்த நாள் மாநாடு செப்டம்பர் 15-ல் நடக்கும் நிலையில், அதற்கு அடுத்த வாரத்திலேயே தனது பிறந்த நாளும் வருவதால் தொண்டர்கள் பெரும் சிரமத்திற்கு ஆளாவதாக அவர் வேதனை தெரிவித்துள்ளார்.

தனது பிறப்புச் சான்றிதழ் குறித்த சுவாரசியமான பின்னணியைப் பகிர்ந்த வைகோ, தான் பிறந்த உண்மைத் தேதி செப்டம்பர் 22 என்ற போதிலும், பள்ளியில் முன்னதாகச் சேர்த்ததால் சான்றிதழில் மே 22 என்று குறிப்பிடப்பட்டுள்ளதாகக் கூறியுள்ளார். ஒருமுறை முன்னாள் பிரதமர் வாஜ்பாய் மே 22 அன்று வாழ்த்தியபோது, உண்மையான தேதியைக் கூறியதை நினைவுகூர்ந்த அவர், வாஜ்பாயும் “என் வாழ்த்துகள் செப்டம்பர் 22-க்கே சேரட்டும்” எனக் கூறியதைச் சுட்டிக்காட்டினார். மேலும், கட்சித் தொண்டர்கள் “வைகோ 83” என்ற லட்சினையையெல்லாம் தயார் செய்துவிட்டதாக அறிந்தபோதிலும், தொண்டர்களின் நலன் கருதி இந்த முடிவை எடுக்க வேண்டியதாயிற்று என்றார்.

தொண்டர்களின் விருப்பத்திற்குச் செவிசாய்க்க முடியவில்லையே என்ற மனவேதனையோடு இந்த முடிவை எடுத்துள்ளதாகக் கூறிய வைகோ, இந்த ஆண்டு மட்டுமின்றி இனிவரும் எந்த ஆண்டிலும் தனக்குப் பிறந்த நாள் விழாக்கள் வேண்டாம் என்று திட்டவட்டமாகக் கேட்டுக்கொண்டுள்ளார். இந்த ஆண்டு பிறந்த நாளன்று பிறர் அறியாத வகையில் எங்காவது சென்று அமைதியாகப் பொழுதைக் கழிக்க விரும்புவதாகவும், தனது மன அமைதிக்காக இந்த முடிவுக்குத் தொண்டர்கள் முழு ஒத்துழைப்பு நல்க வேண்டும் என்றும் மன்றாடிக் கேட்டுக்கொண்டுள்ளார்.