உசிலம்பட்டி சட்டமன்ற உறுப்பினர் ஐயப்பன், தனது அரசியல் வழிகாட்டியாகக் கருதிய ஓ.பன்னீர்செல்வம் மீது பகிரங்கமாக அதிருப்தியை வெளிப்படுத்தியிருப்பது தமிழக அரசியல் களத்தில் விவாதப் பொருளாகியுள்ளது. “எங்களை கரை சேர்ப்பார் என்று நம்பிய தலைவரே கைவிட்டுவிட்டார்” என அவர் குமுறியிருப்பது, ஓபிஎஸ் ஆதரவாளர்கள் மத்தியில் ஏற்பட்டுள்ள விரிசலை அப்பட்டமாகத் காட்டுகிறது. குறிப்பாக, ஓபிஎஸ் வழிகாட்டுதலின் பேரில் திமுகவில் இணைந்த ஐயப்பனுக்கு, இந்தத் தேர்தலில் மீண்டும் போட்டியிட வாய்ப்பு கிடைக்கும் என உறுதியளிக்கப்பட்ட நிலையில், அது நிறைவேறாததே இந்த மனக்கசப்பிற்கு முக்கியக் காரணமாக அமைந்திருக்கிறது.
சட்டப்பேரவையில் முதல்வர் மு.க. ஸ்டாலினைப் புகழ்ந்து தள்ளிய போதே, ஐயப்பனின் அரசியல் நகர்வு பலரது கவனத்தை ஈர்த்தது. அன்று முதல்வரின் ஆட்சியைப் பாராட்டியது முதல், மதுரையில் நடந்த மாநாட்டில் ஓபிஎஸ் உடன் இணைந்து திமுகவில் இணைந்தது வரை அனைத்தும் திட்டமிட்டே நடந்தன. ஆனால், தொகுதிப் பங்கீட்டின் போது உசிலம்பட்டி தொகுதி காங்கிரஸ் கட்சிக்கு ஒதுக்கப்பட்டதால், ஐயப்பனுக்கான வாய்ப்பு பறிபோனது. தனது மகனுக்கே சீட் வாங்க முடியாத சூழலில் ஓபிஎஸ் இருந்தாரா அல்லது ஐயப்பனுக்காகப் போதுமான அழுத்தத்தைக் கொடுக்கத் தவறினாரா என்ற கேள்விகள் தற்போது அவரது ஆதரவாளர்கள் மத்தியில் எழுந்துள்ளன.
வைத்திலிங்கம், மனோஜ் பாண்டியன் போன்ற முக்கிய நிர்வாகிகள் விலகிய போதும், தனக்கு விசுவாசமாக இருந்தவர்களுக்கு ஓபிஎஸ் சீட் பெற்றுத் தருவார் என எதிர்பார்க்கப்பட்டது. ஆனால், ஓபிஎஸ் உள்ளிட்ட முக்கியத் தலைவர்களுக்கு சீட் கிடைத்த நிலையில், தன்னை நம்பி வந்த ஐயப்பனை அவர் கைவிட்டுவிட்டதாகவே அரசியல் விமர்சகர்கள் கருதுகின்றனர். முன்னதாக தமிழக வெற்றிக் கழகத்தில் இணையப்போவதாக எழுந்த வதந்திகளை மறுத்து, “ஓபிஎஸ் எடுப்பதே எனது முடிவு” என விசுவாசம் காட்டிய ஐயப்பனுக்கு, இந்தத் தேர்தல் களம் ஏமாற்றத்தையே பரிசாக அளித்துள்ளது.
இருப்பினும், தனக்கு சீட் கிடைக்கவில்லை என்றாலும் கண்ணியமான அரசியல்வாதியாக ஐயப்பன் ஒரு முடிவை எடுத்துள்ளார். தனது ஆதரவாளர்களிடம் பேசிய அவர், தனிப்பட்ட வருத்தத்தை வெளிப்படுத்தினாலும், “கூட்டணி தர்மத்திற்காக உசிலம்பட்டியில் போட்டியிடும் காங்கிரஸ் வேட்பாளரின் வெற்றிக்காகப் பாடுபட வேண்டும்” எனத் தொண்டர்களுக்கு அறிவுறுத்தியுள்ளார். முதல்வர் மீது கொண்ட ஈர்ப்பால் கட்சியில் இணைந்துவிட்டு, தற்போது வெறும் கையுடன் நிற்பதாக ஐயப்பனின் ஆதரவாளர்கள் வருந்தினாலும், தேர்தல் களத்தில் கட்சியின் வெற்றிக்காக உழைப்பதே இப்போதைய கடமை என்பதில் அவர் உறுதியாக இருக்கிறார்.