தொழிலாளர் வருங்கால வைப்பு நிதி நிறுவனம் (EPFO), சந்தாதாரர்களின் வசதிக்காக ‘EPFO 3.0’ என்ற புதிய திட்டத்தின் கீழ் முக்கிய மாற்றங்களை அறிமுகப்படுத்தியுள்ளது. இதன்படி, குழந்தைகளின் உயர்கல்விக்காக இனி 10 முறை வரையிலும், திருமணச் செலவுகளுக்காக 5 முறை வரையிலும் பிஎஃப் பணத்தை எடுத்துக்கொள்ள அனுமதி அளிக்கப்பட்டுள்ளது.
இதற்கு முன்பு மொத்தம் 3 முறை மட்டுமே எடுக்க முடிந்த நிலையில், தற்போது இந்த எண்ணிக்கை கணிசமாக உயர்த்தப்பட்டுள்ளது. மேலும், அவசரத் தேவைகளுக்காகக் கணக்கிலுள்ள மொத்தத் தொகையில் 75% வரை மட்டுமே எடுக்க முடியும்; மீதமுள்ள 25% தொகை எதிர்கால ஓய்வூதியத்திற்காகக் கணக்கிலேயே இருக்க வேண்டும் என விதிகள் மாற்றப்பட்டுள்ளன.
ஓய்வூதியத் தொகையைப் பெறுவதற்கான கால அளவிலும் புதிய கட்டுப்பாடுகள் விதிக்கப்பட்டுள்ளன. ஒரு பணியாளர் தனது ஓய்வூதியப் பணத்தை முழுமையாகப் பெற வேண்டுமானால், வேலை இழந்த பிறகு 36 மாதங்கள் காத்திருக்க வேண்டும்.
அதேபோல், வேலையில்லாத சூழலில் மீதமுள்ள 25% பிஎஃப் தொகையைப் பெற 12 மாதங்கள் வேலையின்றி இருக்க வேண்டும் என்பது அவசியமாக்கப்பட்டுள்ளது. இந்த மாற்றங்கள் சந்தாதாரர்களின் நீண்டகால நிதிப் பாதுகாப்பை உறுதி செய்யவும், ஓய்வுக் காலத்தில் போதிய பணப்புழக்கம் இருப்பதை உறுதிப்படுத்தவும் கொண்டு வரப்பட்டுள்ளன.