ஈரானுக்குள் நுழையத் துடிக்கும் டிரம்ப்…. தரைவழித் தாக்குதலுக்கு தயாராகும் அமெரிக்கா…. நடுவில் சிக்கும் இந்தியா… நடுங்கும் மிடில் ஈஸ்ட்….!

மத்திய கிழக்கு பிராந்தியத்தில் கடந்த ஒரு மாதத்திற்கும் மேலாக நீடித்து வரும் அமெரிக்கா-இஸ்ரேல் மற்றும் ஈரான் இடையேயான போர், தற்போது ஐக்கிய அரபு அமீரகத்தையும் (UAE) உள்ளே இழுக்கும் அபாயகரமான கட்டத்தை எட்டியுள்ளது. கடந்த சில வாரங்களில் அமீரகத்தின் மீது ஈரான் ஏவிய 2,200-க்கும் மேற்பட்ட ஏவுகணைகள் மற்றும் ட்ரோன் தாக்குதல்கள் அந்நாட்டின் பொறுமையைச் சோதித்து வருகின்றன. 95 சதவீத தாக்குதல்கள் முறியடிக்கப்பட்டாலும், தனது எரிசக்தி உள்கட்டமைப்புகள் மற்றும் அணுசக்தி நிலையங்கள் மீது ஈரான் விடுத்துள்ள நேரடி மிரட்டல், அமீரகத்தை போரில் நேரடியாகப் பங்கேற்கத் தூண்டும் சூழலை உருவாக்கியுள்ளது.

உலக எரிசக்தி வர்த்தகத்தின் இதயத் துடிப்பாக விளங்கும் ஹார்முஸ் நீரிணையை ஈரான் முடக்கியிருப்பது சர்வதேச அளவில் பெரும் பதற்றத்தை ஏற்படுத்தியுள்ளது. இந்தப் பாதையை மீண்டும் சீரமைக்க ஈரானுக்குள் தரைவழிப் படைகளை இறக்க அமெரிக்க அதிபர் டிரம்ப் ஆலோசித்து வரும் நிலையில், அமீரக மண்ணை ஒரு தளமாகப் பயன்படுத்த வாய்ப்புள்ளதாக ஈரான் சந்தேகிக்கிறது. அமெரிக்கா மற்றும் இஸ்ரேலுடன் அமீரகம் கொண்டுள்ள நெருக்கமான உறவு, இந்தப் பிராந்திய மோதலை ஒரு முழு அளவிலான போராக மாற்றும் வெடிமருந்தாக மாறியுள்ளது.

இந்த மோதலில் அமீரகம் நேரடியாக இணையும் பட்சத்தில், அது உலகப் பொருளாதாரத்தில் வரலாறு காணாத பாதிப்புகளை ஏற்படுத்தும். ஏற்கனவே ஹார்முஸ் நீரிணை சிக்கலால் கச்சா எண்ணெய் விலை உயர்ந்து வரும் நிலையில், அமீரகத்தின் நேரடி ஈடுபாடு எண்ணெய்க் கிணறுகளின் உற்பத்தியைப் பாதித்து, விலையை புதிய உச்சத்திற்கு கொண்டு செல்லும். இது சர்வதேச அளவில் கடும் பணவீக்கத்தையும், பொருளாதார மந்தநிலையையும் உருவாக்கி, வளரும் நாடுகளின் சந்தைகளை நிலைகுலையச் செய்யும் காரணியாக அமையும்.

இந்தியாவைப் பொறுத்தவரை இந்தப் போர் சூழல் மிகப்பெரிய அச்சுறுத்தலாகும். அமீரகத்தில் மட்டும் சுமார் 45 லட்சம் இந்தியர்கள் வசித்து வரும் நிலையில், போர் தீவிரமடைந்தால் அவர்களின் பாதுகாப்பு மற்றும் வாழ்வாதாரம் கேள்விக்குறியாகும். மேலும், கச்சா எண்ணெய் விலை உயர்வு இந்தியாவின் இறக்குமதிச் சுமையை அதிகரித்து நாட்டின் பொருளாதார வளர்ச்சியைப் பாதிக்கும். ஒட்டுமொத்தமாக, மோதலில் குறிவைக்கப்பட்ட நாடாக இருந்த அமீரகம், தற்போது போரின் ஒரு பகுதியாக மாறும் நிலை உருவாகியிருப்பது ஆசியப் பிராந்தியத்திற்கே விடப்பட்ட எச்சரிக்கை மணியாகும்.