ஜோசியக்காரன் சொன்னாதான் ஃபைலை திறப்பீர்களா?… சட்டமன்றத்தை உலுக்கிய உதயநிதி ஸ்டாலினின் காரசார கேள்வி….!

சட்டமன்றத்தில் எதிர்கட்சித் தலைவர் உதயநிதி ஸ்டாலின் மற்றும் ஆளுங்கட்சி அமைச்சர்களுக்கு இடையே நடைபெற்ற காரசாரமான விவாதங்கள், தற்போதைய அரசியல் களத்தில் பெரும் பரபரப்பை ஏற்படுத்தியுள்ளன. “எங்களிடம் 3 ஃபைல்கள் உள்ளன. அதை ஓபன் செய்ய வைத்துவிடாதீர்கள் என முதல்வர் கூறுகிறார். தயவுசெய்து அந்த ஃபைல்களை உடனே திறந்து பார்த்து நடவடிக்கை எடுங்கள். எதற்காகப் பயந்து காலம் தாழ்த்துகிறீர்கள்? ஃபைலைத் திறக்க ஜோசியக்காரன் சொன்னால்தான் திறப்பீர்களா?” என உதயநிதி ஸ்டாலின் காட்டமாகக் கேள்வியெழுப்பினார். இதற்குப் பதிலளித்த விடுதலைச் சிறுத்தைகள் கட்சியின் துணைப் பொதுச்செயலாளர் ஆதவ் அர்ஜூனா, மிசாவையே பார்த்தவர்கள் தங்கள் தலைவர்கள் என்றும், சட்டப்படி உரிய நேரத்தில் அந்த ஃபைல்கள் மீது முதல்வர் நடவடிக்கை எடுப்பார் என்றும் உறுதியளித்தார்.

இவ்விவாதத்தின் போது ‘ஜோதிடர்’ என்ற வார்த்தையைப் பயன்படுத்தியதற்கு நீர்வளத்துறை அமைச்சர் ஆனந்த் ஆட்சேபம் தெரிவித்து, அதை அவைக்குறிப்பில் இருந்து நீக்கக் கோரிக்கை வைத்தார். இதற்குப் பதிலடி கொடுக்கும் வகையில் நிர்மல்குமார் பேசுகையில், ஜோசியம் பார்த்து மஞ்சள் துண்டு போட்ட வரலாறுகள் தங்களுக்கும் தெரியும் என்றும், அரசு எப்போது நடவடிக்கை எடுக்க வேண்டுமோ அப்போது சரியான நேரத்தில் எடுக்கும் என்றும் தெரிவித்தார். தொடர்ந்து பேசிய உதயநிதி ஸ்டாலின், அவைக் குறிப்பிலிருந்து நீக்கப்படும் விவாதங்கள் கூட சமூக வலைதளங்களில் ‘ரீல்ஸ்’ ஆக வெளியாகி விடுவதாகச் சுட்டிக்காட்டினார். இதற்குப் பதிலளித்த சபாநாயகர், அவையிலிருந்து நீக்கப்பட்ட வாதங்களை வெளியிடும் ஊடகங்கள் மற்றும் சமூக வலைதளங்கள் மீது கண்டிப்பான உரிமை மீறல் நடவடிக்கை எடுக்கப்படும் என எச்சரித்துள்ளார்.