கர்நாடக மாநிலம் நெலமங்களா தாலுகாவிற்குட்பட்ட கம்பாலு கிராமத்திற்கு அருகே செவ்வாய்க்கிழமை இரவு பயங்கர சாலை விபத்து ஒன்று நிகழ்ந்தது. நண்பரின் பிறந்தநாள் விழாவில் பங்கேற்றுவிட்டு மஹிந்திரா தார் வாகனத்தில் வீடு திரும்பிக் கொண்டிருந்த இளைஞர்களின் வாகனம், ஓட்டுநரின் கட்டுப்பாட்டை இழந்து சாலையில் தலைகீழாகக் கவிழ்ந்தது. இந்த கோர விபத்தில் பவன் மற்றும் தீபக் ஆகிய இரண்டு இளைஞர்கள் சம்பவ இடத்திலேயே பரிதாபமாக உயிரிழந்தனர்.
வாகனத்தில் இருந்த மற்ற மூன்று பேர் பலத்த காயங்களுடன் உயிருக்குப் போராடிய நிலையில், அப்பகுதி மக்களும் காவல்துறையினரும் இணைந்து அவர்களை மீட்டு அருகில் உள்ள தனியார் மருத்துவமனையில் அனுமதித்தனர். வாகனத்தின் அதிவேகமே இந்த விபத்திற்குக் காரணமாக இருக்கலாம் எனச் சந்தேகிக்கப்படும் நிலையில், தோப்பஸ்பேட்டை காவல்துறையினர் சம்பவ இடத்தைப் பார்வையிட்டு வழக்குப் பதிவு செய்து தீவிர விசாரணை மேற்கொண்டு வருகின்றனர்.