அரசியல் கட்சிகளின் ரோடு ஷோக்களை முறைப்படுத்துவதற்காகத் தமிழக அரசு வெளியிட்ட வழிகாட்டு நெறிமுறைகளை எதிர்த்து, தமிழக வெற்றிக் கழகத்தின் இணைப் பொதுச்செயலாளர் சிடிஆர் நிர்மல் குமார் சென்னை உயர் நீதிமன்றத்தில் தொடர்ந்திருந்த வழக்கைத் திரும்பப் பெறுவதாகத் தவெக தரப்பில் தெரிவிக்கப்பட்டது. இதையேற்று மனுவைத் திரும்பப் பெற நீதிபதிகள் அனுமதி அளித்ததைத் தொடர்ந்து, இந்த வழக்கு அதிகாரப்பூர்வமாகத் தள்ளுபடி செய்யப்பட்டது.
முந்தைய திமுக ஆட்சிக் காலத்தில், சென்னை உயர் நீதிமன்றத்தின் உத்தரவின் அடிப்படையில் அரசியல் கட்சிகளின் ரோடு ஷோக்களுக்கான புதிய வழிகாட்டு நெறிமுறைகள் உருவாக்கப்பட்டு, அரசிதழில் வெளியிடப்பட்டன. கரூரில் கடந்த ஆண்டு செப்டம்பர் 27-ஆம் தேதி தவெக சார்பில் நடத்தப்பட்ட மக்கள் சந்திப்பு நிகழ்ச்சியில் ஏற்பட்ட கடுமையான கூட்ட நெரிசலில் 41 பேர் உயிரிழந்த சோகச் சம்பவமே, இத்தகைய கடுமையான நெறிமுறைகளை அரசு வகுப்பதற்கு முதன்மையான பின்னணியாக அமைந்தது.
அரசு வெளியிட்ட வழிகாட்டு நெறிமுறைகளில், தேர்தல் ஆணையத்தால் அங்கீகரிக்கப்பட்ட கட்சிகளுக்கு முன்னுரிமை அளிக்கும் வகையில் விதிகள் அமைக்கப்பட்டுள்ளதாகவும், இதனால் பதிவு செய்யப்பட்டு இன்னும் அங்கீகாரம் பெறாத புதிய அரசியல் கட்சிகள் கடுமையாகப் பாதிக்கப்படும் என்றும் தவெக தனது மனுவில் வாதிட்டிருந்தது. மேலும், நடைமுறைப்படுத்த முடியாத பல நிபந்தனைகள் அரசியல் கட்சிகள் மீது சுமத்தப்பட்டுள்ளதாகவும், அரசு ஏற்க வேண்டிய பொறுப்புகள் அனைத்தும் அமைப்பாளர்கள் மீது தள்ளப்படுவதாகவும் நிர்மல் குமார் குற்றம்சாட்டியிருந்தார்.
இந்த நிலையில், சென்னை உயர் நீதிமன்றத்தில் நீதிபதிகள் எஸ்.எம்.சுப்பிரமணியம் மற்றும் ஆர்.ராஜேஷ் விவேகானந்தன் ஆகியோர் அடங்கிய அமர்வு முன்பாக இந்த மனு மீண்டும் விசாரணைக்கு வந்தபோது, மனுவைத் திரும்பப் பெற்றுக்கொள்வதாகத் தவெக வழக்கறிஞர் கோரிக்கை வைத்தார். தவெகவின் இந்த வேண்டுகோளை ஏற்றுக்கொண்ட நீதிபதிகள், வழக்கை முடித்துவைத்து உத்தரவிட்டனர்.