“6 மாதம் கூட தாங்காது வண்டி”…. எம்பிக்கள், எம்.எல்.ஏ-க்களுக்கு ரூ.25 கோடி ஆஃபர்?…. தவெக குதிரை பேர விவகாரத்தில் வெளிவந்த பரபரப்பு உண்மை…..!

அரசியல் விமர்சகரும் மூத்த எழுத்தாளருமான ராஜகம்பீரன், ‘News focus tamil’ யூடியூப் சேனலுக்கு அளித்த பேட்டியில் தமிழக வெற்றிக் கழகத்தின் ஆட்சி மற்றும் அதன் அரசியல் நகர்வுகள் குறித்துக் கடுமையாக விமர்சித்துள்ளார். தவெக அரசு ஆறு மாதங்களுக்கு மேல் தாங்காது என்றும், வரும் ஜனவரி மாதத்திற்குள் நீதிமன்ற வழக்குகளின் வாயிலாகவே இந்த ஆட்சியின் நிலைமை முடிவுக்கு வரக்கூடும் என்றும் தவெகவைச் சேர்ந்தவர்களே அஞ்சுகின்றனர் என அவர் தெரிவித்துள்ளார். மேலும், திருமாவளவன், காங்கிரஸ், முஸ்லிம் லீக் போன்ற தலைவர்கள் எவ்வளவு ஆதரவளித்தாலும், இது மறைமுகமாக பாஜகவின் நிழல் அதிகாரத்தில் இயங்கும் அரசு என்பது விரைவில் வெளிப்பட்டுவிடும் என்றும் அவர் ஆருடம் கணித்துள்ளார்.

தவெக கொள்கை அரசியலை முற்றிலுமாக விடுத்து, குதிரை பேர அரசியலை மட்டுமே நம்பிச் செயல்படுவதாகச் சாடியுள்ள ராஜகம்பீரன், அதிமுக எம்.எல்.ஏ-க்களைத் தங்கள் பக்கம் இழுக்கத் தீவிர முயற்சி நடப்பதாகக் குற்றம் சாட்டியுள்ளார். இதற்காக ராஜினாமா செய்யும் எம்.எல்.ஏ-க்களுக்கு முதற்கட்டமாக ரூ. 25 கோடியும், தேர்தல் செலவுகளுக்காக ரூ. 35 கோடியும் நிர்ணயிக்கப்பட்டுள்ளதாகக் குறிப்பிட்டார். மதச்சார்பின்மை என்ற வார்த்தையைப் பயன்படுத்துவதில் கூட தவெக தயக்கம் காட்டுவதாகவும், பெரியார் பிறந்தநாள் பேரணி மற்றும் நீட் எதிர்ப்புப் போராட்டங்களுக்கு அனுமதி மறுப்பது போன்ற காவல்துறை நடவடிக்கைகள் அனைத்தும் பாஜகவின் திட்டமிடுதல் மற்றும் வழிகாட்டுதலின் அடிப்படையிலேயே நடப்பதாகவும் சாடியுள்ளார்.

சட்டமன்றத்தில் முக்கியப் பிரச்சினைகளைப் பற்றி விவாதிக்காமல், கூட்டத் தொடரின் கடைசி நாளில் தனியார் பல்கலைக்கழக மசோதாவை நிறைவேற்றியதன் மூலம் இந்த அரசு கார்ப்பரேட்டுகளுக்குச் சாதகமாகச் செயல்படுகிறது என்று ராஜகம்பீரன் சாடியுள்ளார். 12 ஏக்கர் நிலம் வைத்திருப்பவர் கூட பல்கலைக்கழகம் தொடங்கலாம் என்ற நிலை உருவானால், கல்வி கட்டணம் மற்றும் பாடத்திட்டம் அவர்களின் சுய கட்டுப்பாட்டிற்குள் சென்று, ஏழை எளிய மக்களுக்குக் கல்வி மீண்டும் எட்டாக்கனியாக மாறிவிடும் என அவர் கவலை தெரிவித்துள்ளார்.

விஜய்யின் கொள்கை மற்றும் நடைமுறை அரசியலுக்கு இடையே உள்ள முரண்பாடுகளைச் சுட்டிக்காட்டிய ராஜகம்பீரன், “கடவுள் மறுப்பைத் தவிர பெரியாரின் அனைத்துக் கொள்கைகளையும் ஏற்றுக் கொண்டேன்” என்று விஜய் சொல்வது வேடிக்கையானது என்றார். விஜயின் ஆட்சி நிர்வாகமும் நடைமுறைச் செயல்பாடுகளும் பெரியாரின் வழியில் செல்லாமல், நரேந்திர மோடியின் வழியிலேயே செல்கின்றன. பெரியாருக்கும் நரேந்திர மோடிக்கும் ஒரே நாளில் பிறந்தநாள் என்பதால், இதில் “பெரியார் யார், மோடி யார்?” என்பதில் விஜய்க்கு ஏதேனும் குழப்பம் ஏற்பட்டுவிட்டதா என்று தெரியவில்லை என்றும் நகைச்சுவையுடன் விமர்சித்துள்ளார்.