தமிழகத்தில் காலியாக உள்ள 7 சட்டமன்றத் தொகுதிகளுக்கான இடைத்தேர்தல் தேதி இன்னும் அதிகாரப்பூர்வமாக அறிவிக்கப்படவில்லை. இருப்பினும், ஆளுங்கட்சியான தமிழக வெற்றிக் கழகம் தனது அரசியல் கணக்குகளை கச்சிதமாக வகுத்து வருகிறது. சட்டசபை பலத்தை அதிகரிப்பது ஒருபுறம், எதிர்க்கட்சிகளின் அரசியல் தாக்குதல்களை முறியடிப்பது மறுபுறம் என இரட்டை முனை வியூகத்துடன் தவெக களமிறங்க ஆயத்தமாகி வருகிறது.
தற்போது சட்டசபையில் தவெகவுக்கு 107 உறுப்பினர்கள் உள்ளனர். ஆட்சிக்கான பெரும்பான்மைக்கு 118 இடங்கள் தேவைப்படும் நிலையில், நடைபெறவுள்ள இடைத்தேர்தலில் 7 தொகுதிகளையும் கைப்பற்றினால் தவெகவின் பலம் 114 ஆக உயரும். தனிப்பெரும்பான்மையை எட்டுவதற்கு மேலும் 4 இடங்களே குறைவாக இருக்கும் என்பதால், கூட்டணிக் கட்சிகளின் தொடர் ஆதரவோடு ஆட்சியை தடையின்றி நடத்துவதில் எவ்வித சிக்கலும் இருக்காது என அரசியல் ஆய்வாளர்கள் கணிக்கின்றனர்.
இந்த இடைத்தேர்தலை வெறும் தொகுதிகளின் வெற்றி-தோல்வியாக பார்க்காமல், சட்டமன்றத்தில் தன் பலத்தை நிரூபிக்கும் ஒரு முக்கிய வாய்ப்பாகவே தவெக பார்க்கிறது. இடைத்தேர்தலில் வெற்றி பெறுவது, அரசு மீது மக்கள் வைத்துள்ள ஆதரவை வெளிப்படுத்தும் முக்கிய அரசியல் செய்தியாக மாறும். இந்த பின்னணியில்தான், நிதித்துறை ஆய்வு தொடர்பான 3 முக்கிய கோப்புகள் ஆதாரங்களுடன் தன் மேஜையில் இருப்பதாகவும், தக்க நேரத்தில் அவை வெளிப்படுத்தப்படும் என்றும் முதலமைச்சர் ஜோசப் விஜய் சட்டமன்றத்தில் பேசியது பெரும் விவாதத்தை ஏற்படுத்தியுள்ளது.
தேர்தல் தேதி அறிவிக்கப்படும் சூழலில் இந்த ஊழல் கோப்புகள் தொடர்பான விவரங்கள் வெளியாகலாம் என்றும், அது மக்கள் மத்தியில் ஆளுங்கட்சியின் செல்வாக்கை மேலும் உயர்த்தும் என்றும் தவெக திட்டமிடுகிறது. அதேவேளையில், “இத்தகைய மிரட்டல்களுக்குப் பயப்பட மாட்டோம்” என்று எதிர்க்கட்சித் தலைவர் உதயநிதி ஸ்டாலின் ஏற்கனவே கூறியிருப்பதால், இந்த ஆவணங்களை ஆதாரங்களுடன் சட்டரீதியாக நிரூபிப்பது விஜய் அரசுக்கு பெரிய சவாலாகவே அமையும்.