தமிழகத்தில் கடந்த 60 ஆண்டுகளுக்குப் பிறகு திராவிடக் கட்சிகள் அல்லாத புதியதொரு ஆட்சி அமைந்தபோது, மக்கள் மத்தியில் எதிர்பார்ப்புகள் விண்ணைத் தொட்டன. ஆனால், ஆட்சிப் பொறுப்பேற்றது முதல் தவெக அரசுக்குத் தொடர் சவாலாக உருவெடுத்துள்ளது மின்வெட்டுப் பிரச்சனை. முந்தைய ஆட்சிக் காலங்களிலும் மின்வெட்டு இருந்தபோதிலும், தலைநகர் சென்னையில் அதிகபட்சமாக 20 நிமிடங்களுக்கு மேல் மின்தடை நீடித்ததில்லை. ஆனால், தவெக ஆட்சியில் சென்னையில் சில இடங்களில் 6 மணி நேரம் வரை மின்தடை ஏற்பட்டதாகக் கூறப்படும் புகார்கள், பொதுமக்களைக் கடுமையான அதிருப்திக்கு உள்ளாக்கியதுடன், எதிர்க்கட்சிகளுக்கு அரசை விமர்சிப்பதற்கான பிரதான ஆயுதமாகவும் மாறியுள்ளது.
இந்தப் பிரச்சனைக்குத் தீர்வுகாணும் நோக்கில், மின்வாரியத் துறையின் தற்போதைய நிலை குறித்த வெள்ளை அறிக்கையை அரசு அண்மையில் வெளியிட்டிருந்தது. அதில் மின்வாரியத்தில் சுமார் 65,921 பணியிடங்கள் காலியாக இருப்பது சுட்டிக்காட்டப்பட்டு, இப்பற்றாக்குறையை ஒப்பந்த நிறுவனங்கள் மூலமாக ஆட்களைக் கொண்டு தற்காலிகமாக நிரப்ப நடவடிக்கை எடுக்கப்படும் என மின்சாரத் துறை அமைச்சர் நிர்மல் குமார் தெரிவித்திருந்தார். அரசின் இந்த அறிவிப்புதான் தற்போது புதியப் புயலைக் கிளப்பியுள்ளது. தங்களை பணி நிரந்தரம் செய்ய வேண்டும் என நீண்ட நாட்களாகக் கோரி வரும் ஒப்பந்தத் தொழிலாளர்கள் மத்தியில் இந்த முடிவு பெரும் கொந்தளிப்பை ஏற்படுத்தியுள்ளது.
இதன் எதிரொலியாக, மேட்டூர் அனல் மின் நிலையம் உட்பட தமிழகத்தின் பல்வேறு பகுதிகளில் மின்வாரிய ஒப்பந்தத் தொழிலாளர்கள் திடீர் வேலை நிறுத்தப் போராட்டத்தில் குதித்துள்ளனர். இந்தத் தற்காலிக வேலை நிறுத்தம் காரணமாக ஆங்காங்கே மின் உற்பத்தி மற்றும் விநியோகத்தில் பாதிப்புகள் ஏற்பட்டு, அரசுக்குக் கூடுதல் நெருக்கடியை உருவாக்கியுள்ளது. நிலைமையின் தீவிரத்தை உணர்ந்த அமைச்சர் நிர்மல் குமார், மதுரையில் போராட்டத்தில் ஈடுபட்ட தொழிலாளர்களுடன் நேரில் சென்று பேச்சுவார்த்தை நடத்தியுள்ளார். தற்போதைய போராட்டம் தற்காலிகமானது என்றாலும், தங்களின் பணி நிரந்தரம் உள்ளிட்ட கோரிக்கைகள் நிறைவேற்றப்படாவிட்டால், மாநிலம் தழுவிய தொடர் போராட்டம் வெடிக்கும் எனத் தொழிலாளர்கள் எச்சரித்துள்ளனர்.
மின்வெட்டுப் பிரச்சனையைச் சமாளிக்க ஏற்கனவே துறை ரீதியாகப் பல அதிரடி அதிகாரி மாற்றங்களை முதலமைச்சர் விஜய் மேற்கொண்டிருந்தார். இத்தகையச் சூழலில், ஒப்பந்தத் தொழிலாளர்களின் இந்த வேலை நிறுத்தம் ஒட்டுமொத்தப் விநியோகக் கட்டமைப்பையும் பாதிக்கும் என்பதால், இது முதலமைச்சருக்கு கடும் அதிருப்தியையும் தலைவலியையும் ஏற்படுத்தியுள்ளது. இந்தத் தற்காலிகப் போராட்டத்தை அரசு பேச்சுவார்த்தை மூலம் கையாண்டாலும், பணி நிரந்தரம் போன்ற அவர்களின் நீண்டகாலக் கோரிக்கைகளுக்கு நிரந்தரத் தீர்வு காணாவிட்டால், தவெக அரசுக்கு இது மிகப்பெரிய நிர்வாகச் சவாலாக மாறும் என்பதில் சந்தேகமில்லை.