தமிழகத்தில் தமிழக வெற்றிக் கழகம் தலைமையிலான கூட்டணி ஆட்சி அமைந்த சில மாதங்களிலேயே, கூட்டணிக் கட்சிகளிடையே மனக்கசப்புகளும் முரண்பாடுகளும் உச்சக்கட்டத்தை எட்டியுள்ளன. சமீபத்தில் தமிழக அரசின் பிற்படுத்தப்பட்டோர் துறை மானியக்கோரிக்கை புத்தகத்தில் தந்தை பெரியார் மற்றும் அண்ணல் அம்பேத்கர் பெயர்கள் தவிர்க்கப்பட்ட விவகாரம், விசிகவை கடும் அப்செட்டிற்கு உள்ளாக்கியுள்ளது. இது தொடர்பாக விசிக தலைவர்கள் முதலமைச்சரை சந்தித்து முறையிடத் திட்டமிட்டுள்ள நிலையில், கூட்டணிக்குள் அடுத்த பெரிய புயலாக காங்கிரஸ் கட்சியும் தவெக அரசுக்கு எதிராக வெளிப்படையாகவே களமிறங்கியுள்ளது.
மத்தியில் பிரதமர் வேட்பாளராக தவெக தரப்பில் விஜய்யை முன்னிறுத்திப் பேசுவது, காங்கிரஸ் தலைமையையும் ராகுல் காந்தியையும் நேரடியாகச் சீண்டும் செயலாக மாறியுள்ளது. தவெக அமைச்சர்களின் இந்தப் பேச்சு பாஜகவை திருப்திப்படுத்தும் நோக்கிலோ என்ற சந்தேகம் காங்கிரஸ் தலைவர்களிடையே எழுந்துள்ளது. தொடக்கத்தில் மென்மையான போக்கைக் கடைப்பிடித்த காங்கிரஸ் தலைவர்கள், தவெக தரப்பிலிருந்து எவ்வித விளக்கமும் வராததால் தற்போது தங்களுடைய கண்டனக் குரலை மிகக் கடுமையாக உயர்த்தத் தொடங்கியுள்ளனர்.
இதன் உச்சக்கட்டமாக, கன்னியாகுமரியில் நடைபெற்ற விழாவில் பேசிய காங்கிரஸ் அமைச்சர் ராஜேஷ்குமார், “ராகுல் காந்தியைப் பிரதமர் வேட்பாளராக ஏற்காவிட்டால் அமைச்சரவையிலிருந்து விலகுவோம்; எங்களுக்குப் பதவியை விடக் கட்சியே பெரிது” என தவெகவுக்கு பகிரங்க எச்சரிக்கை விடுத்துள்ளார். அதேவேளையில், காங்கிரஸ் கட்சியின் மற்றொரு அமைச்சரான விஸ்வநாதன், மேலிட அனுமதி இன்றி இப்படிப் பேசுவது தவெகவுடனான உறவைப் பாதிக்கும் எனக் கூறி ராஜேஷ்குமாரிடம் தன் மாற்றுக் கருத்தைப் பதிவு செய்திருப்பதாகத் தகவல்கள் தெரிவிக்கின்றன.
இருப்பினும், “ராகுல் காந்தியை மதிக்காத இடத்தில் பதவி முக்கியமில்லை, முரண்பாடுகள் வந்தால் வரட்டும்” என ராஜேஷ்குமார் கறாராகப் பதிலளித்துள்ளதால், காங்கிரஸ் அமைச்சர்களிடையே கருத்து வேறுபாடு எழுந்துள்ளது தெளிவாக்கியுள்ளது. சத்தியமூர்த்தி பவன் வட்டாரங்களில் இது பெரும் விவாதப் பொருளாக மாறியுள்ள சூழலில், தலைமையின் நிலைப்பாட்டைப் புரிந்து கொண்டு விஸ்வநாதனின் டோனும் விரைவில் மாற வாய்ப்புள்ளதாகக் கூறப்படுகிறது. ஒட்டுமொத்தமாக, விசிக மற்றும் காங்கிரஸின் இந்த தொடர் எதிர்ப்புகளால் தவெக கூட்டணி அரசு பெரும் அரசியல் நெருக்கடியைச் சந்தித்து வருகிறது.