இது என்னடா தளபதிக்கு வந்த சோதனை?… 15 கோடி ரூபாய் விவகாரத்தில் விஜய்க்கு காத்திருக்கும் அடுத்த சவால்… நீதிமன்றத்தில் தாக்கல் செய்த அதிரடி ஆவணங்கள்…!

தமிழக வெற்றிக் கழகத்தின் தலைவரும் நடிகருமான சி. ஜோசப் விஜய், வருமான வரித்துறை விதித்த ₹1.5 கோடி அபராதத்தை எதிர்த்து சென்னை உயர்நீதிமன்றத்தில் மேல்முறையீடு செய்துள்ளார். முன்னதாக, இந்த அபராதத்தை எதிர்த்து அவர் தாக்கல் செய்த மனுவை தனிநீதிபதி தள்ளுபடி செய்திருந்தார். அந்த உத்தரவுக்கு தடை விதிக்கக் கோரியும், அபராதத்தை ரத்து செய்யக் கோரியும் தற்போது இரு நீதிபதிகள் கொண்ட அமர்வில் விஜய் தரப்பு புதிய மனுவைத் தாக்கல் செய்துள்ளது.

இந்த விவகாரத்தின் பின்னணி 2015-ம் ஆண்டு வெளியான ‘புலி’ திரைப்படத்தின் போது நடைபெற்ற வருமான வரித்துறை சோதனையிலிருந்து தொடங்குகிறது. அப்போது, தயாரிப்பாளர்கள் வழங்கிய ₹5 கோடி ரொக்கப் பணம் உட்பட, கணக்கில் காட்டப்படாத ₹15 கோடி கூடுதல் வருமானத்தை விஜய் ஒப்புக்கொண்டு அதற்கான வரிகளையும் செலுத்தியதாகக் கூறப்படுகிறது. இருப்பினும், சோதனையின் போது இந்த வருமானம் கண்டறியப்பட்டதால், வருமான வரிச் சட்டத்தின் கீழ் அபராதம் விதிக்கப்படுவதாகத் துறை அறிவித்தது.

கடந்த 2022-ல் இந்த அபராதத்தை எதிர்த்துத் தொடரப்பட்ட வழக்கை விசாரித்த தனிநீதிபதி செந்தில்குமார் ராமமூர்த்தி, வருமான வரித்துறை சட்டப்பூர்வமான கால வரம்பிற்குள்ளேயே அபராதத்தை விதித்துள்ளதாகக் கூறி விஜய்யின் மனுவைத் தள்ளுபடி செய்தார். மற்ற வாதங்களை விட ‘கால வரம்பு’ (Limitation Period) சரியாக உள்ளது என்பதையே நீதிமன்றம் தனது தீர்ப்பிற்கான முக்கியக் காரணமாகக் குறிப்பிட்டிருந்தது. இதனை எதிர்த்தே இப்போது மேல்முறையீடு செய்யப்பட்டுள்ளது.

தற்போது திரையுலகிலிருந்து விலகி, முழுநேர அரசியலில் ஈடுபட்டுள்ள விஜய்க்கு இந்த வழக்கு முக்கியமானதாகக் கருதப்படுகிறது. தமிழக வெற்றிக் கழகத்தின் அரசியல் பயணத்தைத் தீவிரப்படுத்தி வரும் சூழலில், இந்த சட்டப் போராட்டம் அரசியல் வட்டாரத்தில் பெரும் விவாதத்தை ஏற்படுத்தியுள்ளது. இந்த மேல்முறையீட்டு மனு விரைவில் விசாரணைக்கு வரவுள்ள நிலையில், உயர்நீதிமன்றத்தின் தீர்ப்பு விஜய்யின் அடுத்தகட்ட நகர்வுகளில் முக்கியப் பங்கு வகிக்கும் என எதிர்பார்க்கப்படுகிறது.