அமெரிக்காவிற்கும் ஈரானுக்கும் இடையே நீடித்து வரும் தீவிர போர்ச் சூழல் குறித்து அந்நாட்டு அதிபர் டொனால்ட் ட்ரம்ப் மிக முக்கியமான அறிக்கை ஒன்றை வெளியிட்டுள்ளார். அமெரிக்காவில் இடைக்காலத் தேர்தல்கள் நிறைவடைந்த உடனேயே ஈரானுடனான போர் முழுமையாக முடிவுக்கு வரும் என்று அவர் உறுதியளித்துள்ளார். கடுமையான நிதி நெருக்கடி மற்றும் ராணுவ இழப்புகளால் ஈரான் தற்போது மிகவும் பலவீனமடைந்துள்ளதாகக் குறிப்பிட்ட அவர், அமெரிக்கத் தேர்தலில் ஆட்சி மாற்றம் ஏற்படும் என்ற ஒரே நம்பிக்கையில் மட்டுமே ஈரான் தற்போது போரைக் கடத்த காத்திருப்பதாகத் தெரிவித்தார்.
ஈரானின் தற்போதைய பொருளாதார நிலைமை குறித்து விளக்கிய அதிபர் ட்ரம்ப், அந்நாட்டில் பணவீக்கம் 300 சதவீதத்தை எட்டியுள்ளதாகவும், ராணுவ வீரர்களுக்குச் சம்பளம் கூட வழங்க முடியாத அளவுக்கு ஈரான் பேரழிவைச் சந்தித்துள்ளதாகவும் கூறினார். ஈரானின் பெரும்பாலான ராணுவ உபகரணங்கள் அழிக்கப்பட்டுவிட்டதால், புதிய ஏவுகணைகளைத் தயாரிப்பது அவர்களுக்குக் குதிரைக் கொம்பாக மாறியுள்ளது. இருப்பினும், சாதகமற்ற இந்தச் சூழலிலும் அவர்கள் தொடர்ந்து போரிட்டு வருவதாகவும், ஈரானுக்கு எதிரான இந்த ராணுவ நடவடிக்கை குறித்துத் தனக்கு எந்தவித வருத்தமும் இல்லை என்றும் அவர் அழுத்தமாகக் குறிப்பிட்டார்.
உலகளவில் முக்கியத்துவம் வாய்ந்த கடல்சார் வணிகப் பாதையான ஹார்முஸ் ஜலசந்தி (Strait of Hormuz) குறித்துப் பேசிய ட்ரம்ப், அந்தப் பகுதி தற்போது முழுமையாக அமெரிக்காவின் கட்டுப்பாட்டிற்குள் கொண்டுவரப்பட்டுள்ளதாக அறிவித்தார். ஈரானின் அணுசக்தித் திறன்களைத் தகர்ப்பதற்காகவே தாம் பி-2 குண்டுவீச்சு விமானங்களைப் பயன்படுத்தியதாகவும், அவர்களுடனான அணுசக்தி ஒப்பந்தத்தை ரத்து செய்ததாகவும் கூறினார். ஈரானிய ஆட்சியாளர்களின் மனநிலை இயல்பாக இல்லை என்றும், அமெரிக்கா தடுத்து நிறுத்தாவிட்டால் அவர்கள் நிச்சயம் அணு ஆயுதங்களைப் பயன்படுத்திப் பெரும் அச்சுறுத்தலை உருவாக்கியிருப்பார்கள் என்றும் அவர் குற்றம்சாட்டினார்.
அமெரிக்கா தனது இயல்பான அன்றாட வாழ்க்கையை வாழ்ந்துகொண்டிருக்கும் வேளையில், ஈரானை போன்ற தீவிரப்போக்கு கொண்ட நாட்டின் கைகளில் அணு ஆயுதம் கிடைப்பது உலகப் பாதுகாப்பிற்கே ஆபத்தானது என்பதை ட்ரம்ப் சுட்டிக்காட்டினார். ஈரான் மீதான இந்த தீவிர அழுத்தமும் ராணுவ நடவடிக்கைகளும், அவர்களின் அணு ஆயுதக் கனவை முற்றிலுமாகத் தகர்த்துள்ளதாகத் தெரிவித்த அவர், இடைக்காலத் தேர்தல் முடிவுகளுக்குப் பிறகு இப்பகுதியில் அமைதி திரும்ப அமெரிக்கா அடுத்தகட்ட நடவடிக்கைகளை விரைவுபடுத்தும் என்பதை உறுதிப்படுத்தியுள்ளார்.