விளையாடச் சென்ற இடத்தில் விபரீதம்! சென்னை குரோம்பேட்டை ஏரியில் 4 குழந்தைகள் சடலமாக மீட்பு…. உறைந்துபோன பகுதி மக்கள்….!

சென்னை குரோம்பேட்டை லட்சுமிபுரம் பகுதியைச் சேர்ந்த யுவனேஷ் (10), தேவதர்ஷன் (13) ஆகிய இரு சிறுவர்களும், பூஜா (13), குஷி (13) ஆகிய இரு சிறுமிகளும் நேற்று வழக்கம்போல் தங்கள் வீட்டின் அருகே ஒன்றாக விளையாடிக்கொண்டிருந்துள்ளனர். விளையாடிக்கொண்டிருந்த சிறுவர்கள் நீண்ட நேரமாகியும் வீட்டிற்குத் திரும்பாததால் அதிர்ச்சியடைந்த பெற்றோர், அக்கம் பக்கத்திலும் அப்பகுதியிலும் தீவிரமாகத் தேடிப் பார்த்துள்ளனர். ஆனால் சிறுவர்கள் எங்கு தேடியும் கிடைக்காததால், பதற்றமடைந்த குடும்பத்தினர் உடனே குரோம்பேட்டை காவல் நிலையத்தில் புகார் அளித்தனர்.

புகாரின் பேரில் வழக்குப் பதிவு செய்த போலீசார் அப்பகுதியில் தீவிர விசாரணை மேற்கொண்டனர். அப்போது, சிறுவர்கள் சிலர் அருகிலுள்ள குரோம்பேட்டை பெரிய ஏரிப் பகுதியில் குளித்துக் கொண்டிருந்ததாக அப்பகுதியினர் போலீசாரிடம் தெரிவித்தனர். இதனையடுத்து, நேற்று இரவு முதல் இன்று காலை வரை காவல்துறையினரும் மீட்புக் குழுவினரும் ஏரிப் பகுதியில் தீவிர தேடுதல் வேட்டையில் ஈடுபட்டனர்.

இந்தத் தேடுதலின் முடிவில், ஏரியில் மூழ்கி உயிரிழந்த 4 சிறுவர்களின் உடல்களும் இன்று காலை சடலமாக மீட்கப்பட்டன. உடல்களைக் கைப்பற்றிய போலீசார், அவற்றை உடற்கூறாய்வுக்காக மருத்துவமனைக்கு அனுப்பி வைத்தனர். ஒரே பகுதியைச் சேர்ந்த இரண்டு பெண் குழந்தைகள் உட்பட 4 சிறுவர்கள் ஏரியில் மூழ்கி பரிதாபமாக உயிரிழந்த இச்சம்பவம், அப்பகுதி மக்களிடையே பெரும் அதிர்ச்சியையும் ஆழமான சோகத்தையும் ஏற்படுத்தியுள்ளது.