மக்களுக்கு ஆபத்துன்னா நாங்க சும்மா இருக்க மாட்டோம்… மாநகராட்சி அலட்சியத்தால் கையில்… சிமெண்ட் எடுத்த டிராபிக் போலீஸ்… இணையத்தில் வைரலாகும் வீடியோ…!

பெங்களூரு ஞானபாரதி மெட்ரோ ரயில் நிலையம் அருகே போக்குவரத்து காவல் துறையினர் தங்களின் வழக்கமான பணிகளைத் தாண்டி, சிமெண்ட் கொண்டு சாலைப் பள்ளங்களை மூடும் அசாதாரணமான முயற்சியில் ஈடுபட்டனர். அண்மையில் பெய்த மழையால் இந்த முக்கிய சந்திப்பில் பெரும் பள்ளங்கள் ஏற்பட்டு, வாகனங்கள் மெதுவாகச் செல்ல வேண்டிய நிலை உருவானது. இதனால் கடுமையான போக்குவரத்து நெரிசல் ஏற்பட்டு வாகன ஓட்டிகள் மிகுந்த அவதிக்குள்ளாகினர்.

இந்தச் சாலைப் பகுதி ‘கிரேட்டர் பெங்களூரு அத்தாரிட்டி’ மேற்கு நகரக் கழகத்தின் எல்லைக்கு உட்பட்டதாகும். சாலைப் பள்ளங்கள் காரணமாக நிலவும் போக்குவரத்துச் சிக்கல்கள் குறித்து, அப்பகுதி போக்குவரத்து போலீசார் தகுந்த மாநகராட்சி அதிகாரிகளுக்குப் பலமுறை புகார் அளித்து கவனத்திற்குக் கொண்டு சென்றனர். இருப்பினும், மாநகராட்சி நிர்வாகத்தின் தரப்பில் இருந்து எந்தவிதமான தகுந்த நடவடிக்கையும் எடுக்கப்படவில்லை என்று கூறப்படுகிறது.

https://twitter.com/CNNnews18/status/2120088337063260529/video/1

அதிகாரிகளின் இந்த அலட்சியப் போக்கால் அதிருப்தியடைந்த பைடராயனபுரா போக்குவரத்து காவல் நிலைய போலீசார், பொதுமக்களின் பாதுகாப்பைக் கருதி இப்பணியைத் தாங்களாகவே செய்யத் துணிந்தனர். போக்குவரத்து காவல் துணை ஆய்வாளர் நாகராஜ் ஏ.ஆர். தலைமையிலான போலீசார் அங்கிருந்த பள்ளங்களைச் சிமெண்ட் கொண்டு தற்காலிகமாகச் சீரமைத்தனர். இவர்களுடன் அப்பகுதியில் காலை உடற்பயிற்சி மேற்கொண்ட ஒரு பொதுமகனும் இணைந்து இப்பணியில் ஈடுபட்டார். இந்தத் தற்காலிகச் சீரமைப்புப் பணியால் வாகனங்கள் தடையின்றிச் செல்ல வழிவகை செய்யப்பட்டுள்ளது.