காற்றாலை சிசிடிவி-யில் சிக்கிய ‘அந்த’ ஒரு வண்டி எண்… தர்ம முனீஸ்வரன் குற்றவாளி…. 76 நாளில் போக்சோ கோர்ட் கொடுத்த மரண அடி தீர்ப்பு…!

தூத்துக்குடி மாவட்டம் விளாத்திகுளம் அருகே உள்ள வேடநத்தம் கிராம காட்டுப்பகுதியில், கடந்த மார்ச் 11 ஆம் தேதி பிளஸ் 2 பள்ளி மாணவி ஒருவர் கொடூரமான முறையில் சடலமாக மீட்கப்பட்டார். இந்த சம்பவம் தமிழகம் முழுவதும் பெரும் அதிர்வலைகளையும் சோகத்தையும் ஏற்படுத்தியது. இக்கொடூர குற்றத்தில் ஈடுபட்ட நபரைக் கண்டறிய காவல்துறை தரப்பில் 10 தனிப்படைகள் அமைக்கப்பட்டு தீவிர விசாரணை முடுக்கிவிடப்பட்டது.

விசாரணையின் ஒரு பகுதியாக, சம்பவ இடத்திற்கு அருகில் இருந்த காற்றாலையின் சிசிடிவி (CCTV) காட்சிகளைப் போலீஸார் ஆய்வு செய்தனர். அதில் சந்தேகத்திற்கிடமான முறையில் பைக்கில் சென்ற ஒரு நபரின் காட்சிகள் பதிவாகியிருந்தன. அந்த பைக்கின் பதிவு எண்ணை வைத்துத் தேடியபோது, அது திருடப்பட்ட வாகனம் என்பது தெரியவந்தது. இதனைத் தொடர்ந்து நடத்தப்பட்ட அதிரடி விசாரணையில், பைக்கை திருடிச் சென்று மாணவியைக் கொடூரமாகக் கொலை செய்தது ராமநாதபுரம் மாவட்டம் சாயல்குடியைச் சேர்ந்த தர்ம முனீஸ்வரன் என்பது கண்டுபிடிக்கப்பட்டு, அவர் கைது செய்யப்பட்டார்.

கைது செய்யப்பட்ட தர்ம முனீஸ்வரனிடம் நடத்தப்பட்ட மேல் விசாரணையில் அதிர்ச்சியூட்டும் பல உண்மைகள் அம்பலமாகின. இவர் ஏற்கனவே கடந்த 2020 ஆம் ஆண்டு எட்டயபுரம் பகுதியில் மூதாட்டி ஒருவரைப் பாலியல் வன்கொடுமை செய்து கொலை செய்த வழக்கில், 2022 இல் கைது செய்யப்பட்டவர் என்பது தெரியவந்தது. அந்த வழக்கில் பிணையில் (ஜாமீனில்) வெளியே வந்திருந்த நிலையில்தான், மீண்டும் இந்த கொடூரமான செயலில் அவர் ஈடுபட்டுள்ளார். இதையடுத்து அவர் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார்.

இவ்வழக்கு தூத்துக்குடி மாவட்ட போக்சோ (POCSO) நீதிமன்றத்தில் நீதிபதி பிரீத்தா முன்னிலையில் அதிவேகமாக நடைபெற்று வந்தது. சாட்சிகளிடம் முழுமையாக விசாரணை நடத்தி முடிக்கப்பட்ட நிலையில், துயரச் சம்பவம் நடந்த வெறும் 76 நாட்களிலேயே நீதிமன்றம் இன்று தனது தீர்ப்பை வழங்கியுள்ளது. அதன்படி, கைது செய்யப்பட்டுள்ள தர்ம முனீஸ்வரன் குற்றவாளி என்று நீதிமன்றம் அதிரடியாக அறிவித்துள்ளது. இந்த வழக்கிற்கான தண்டனை விவரங்கள் இன்று நண்பகல் 12.30 மணிக்கு அறிவிக்கப்படும் என்றும் நீதிபதி உத்தரவிட்டுள்ளார்.