“தேமுதிகவை திடீரென தூக்கி வந்தது ஏன்?”…. திமுக கூட்டணியின் பகிரங்க இரகசியத்தை உடைத்த திருமா….!

திமுக கூட்டணியில் இருந்து விடுதலைச் சிறுத்தைகள் கட்சி, காங்கிரஸ் மற்றும் இடதுசாரி கட்சிகள் வெளியேறியதற்கு திமுகவின் அணுகுமுறையே முதன்மையான காரணம் என்று விசிக தலைவர் தொல். திருமாவளவன் குற்றம் சாட்டியுள்ளார். திருமண நிகழ்ச்சி ஒன்றில் கலந்துகொண்டு பேசிய அவர், கூட்டணியை உடைக்காமல் காப்பாற்ற தாம் தொடர்ச்சியாக முயற்சித்ததாகவும், ஆனால் திமுக நிர்வாகத்தால் அதைச் செய்ய முடியாமல் போகிவிட்டது என்றும் தெரிவித்தார். மேலும், காங்கிரஸ் போன்ற தோழமை கட்சிகளுடன் திமுக நல்லுறவைப் பேணியிருந்தால் அவர்கள் கூட்டணியை விட்டு விலகியிருக்க மாட்டார்கள் என்றும், மற்ற கூட்டணி கட்சிகளுக்கு விருப்பமில்லாத சூழலிலும் திடீரென தேமுதிகவை உள்ளே கொண்டு வந்தது யாருக்கும் மகிழ்ச்சியை அளிக்கவில்லை என்றும் அவர் தனது உரையில் சுட்டிக்காட்டினார்.

தொடர்ந்து பேசிய திருமாவளவன், தவெக உடனான கூட்டணி முடிவுக்கு விசிகவின் வன்னி அரசே முக்கியக் காரணம் என்பதைத் தெளிவுபடுத்தினார். இடைத்தேர்தலில் நிற்காமல், அமைச்சர் பதவிகளை நிராகரித்து வந்த நிலையில், எளிய குடும்பத்தைச் சேர்ந்த வன்னி அரசு போன்ற 30 ஆண்டு கால விசுவாசிகளுக்கு அமைச்சர் வாய்ப்பு கிடைக்கும்போது அதைத் தட்டிப் பறிப்பது சரியாக இருக்காது என்பதற்காகவே இந்த முடிவை எடுத்ததாகக் கூறினார். திமுக உடனான உறவில் விரிசல் ஏற்பட்டதற்கும், தோழமை கட்சிகள் ஒவ்வொன்றாக வெளியேறியதற்கும் திமுகவின் செயல்பாடுகளே பொறுப்பேற்க வேண்டும் என்றும், இதில் திராவிட இயக்கங்கள் தம்மை விமர்சிப்பது நியாயமற்றது என்றும் அவர் காரசாரமாகத் தெரிவித்தார்.