அதிமுகவில் நிலவும் உட்கட்சிப் பூசல்கள் மற்றும் அரசியல் மாற்றங்களால், அக்கட்சியில் இருந்து நீக்கப்பட்ட மற்றும் அதிருப்தியில் இருந்த முக்கியத் தலைவர்கள் பலரும் தற்போது நடிகர் விஜய்யின் தமிழக வெற்றிக் கழகத்தை நோக்கி நகரத் தொடங்கியுள்ளனர். ஏற்கனவே முன்னாள் அமைச்சர் செங்கோட்டையன் தவெகவில் இணைந்து அக்கட்சியின் தலைமை ஒருங்கிணைப்பாளராகப் பொறுப்பு வகித்து வரும் நிலையில், இன்று அதிமுக முன்னாள் எம்எல்ஏ ஜேசிடி பிரபாகர் அதிகாரப்பூர்வமாகத் தவெகவில் இணைந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
அதிமுக பொதுச் செயலாளர் எடப்பாடி பழனிசாமியின் தலைமையைத் தனிமைப்படுத்தவும், வரும் தேர்தலில் அவருக்குப் பெரும் சவாலை ஏற்படுத்தவும் அதிருப்தித் தலைவர்கள் ஒன்றிணைந்து விஜய் தலைமையிலான தவெகவில் இணைந்து வருவதாகக் கூறப்படுகிறது. மேலும், ஓபிஎஸ் மற்றும் டிடிவி தினகரன் ஆகியோருடன் பயணித்து வரும் மற்ற சில முக்கிய நிர்வாகிகளும் அடுத்தடுத்த நாட்களில் விஜய் கட்சியில் இணையத் திட்டமிட்டுள்ளதாகத் தகவல்கள் வெளியாகியுள்ளன. இது 2026 சட்டமன்றத் தேர்தலுக்கு முன்னதாக தமிழக அரசியலில் ஒரு பெரிய அதிகார மாற்றத்திற்கு வழிவகுக்கும் என்று எதிர்பார்க்கப்படுகிறது.