சோமாலியாவின் பாதுகாப்புப் பணிகளில் உகாண்டா ராணுவம் ஈடுபட்டு வரும் சூழலில், அதன் மூலம் கிடைக்கும் பொருளாதாரப் பலன்களை துருக்கி அனுபவிப்பதாக உகாண்டா ராணுவத் தளபதியும் அந்நாட்டு அதிபரின் மகனுமான முஹூசி கைனெருகாபா (Muhoozi Kainerugaba) சர்ச்சைக்குரிய கோரிக்கை ஒன்றை முன்வைத்துள்ளார். தங்கள் நாட்டு வீரர்களின் தியாகத்திற்கு இழப்பீடாக 1 பில்லியன் டாலர் தொகையையும், துருக்கியின் மிக அழகான பெண்ணை தனக்கு மனைவியாகவும் வழங்க வேண்டும் என அவர் நிபந்தனை விதித்துள்ளார்.
இந்த விசித்திரமான கோரிக்கைகளை நிறைவேற்ற துருக்கிக்கு 30 நாட்கள் காலக்கெடு விதித்துள்ள முஹூசி, அவ்வாறு செய்யத் தவறினால் துருக்கி உடனான தூதரக உறவுகள் துண்டிக்கப்படும் என எச்சரிக்கை விடுத்துள்ளார். சமூக வலைதளங்களில் பரபரப்பை ஏற்படுத்தியுள்ள அவரது இந்தப் பதிவு, சர்வதேச அரசியல் மற்றும் ராஜதந்திர வட்டாரங்களில் கடும் அதிர்ச்சியை ஏற்படுத்தியுள்ளது. இது ஒரு அதிகாரப்பூர்வ அறிவிப்பா அல்லது அவரது தனிப்பட்ட கருத்தா என்ற விவாதம் தற்போது எழுந்துள்ளது.