“உங்களுக்கு ஏன் இந்த வன்மம்?.. அதுக்குள்ளே கலைஞர் படம் நீக்கமா?.. கொதித்தெழுந்த திமுக.. தமிழக அரசு கொடுத்த அதிரடி விளக்கம்”.. !!

சென்னை அண்ணா சாலையில் உள்ள தேவநேயப் பாவாணர் நூலக அரங்கில், பள்ளிக்கல்வித்துறை அமைச்சர் ராஜ்மோகன் பங்கேற்ற நிகழ்ச்சியின்போது முன்னாள் முதலமைச்சர் கருணாநிதியின் புகைப்படம் மட்டும் தனியாக அகற்றப்பட்டதாக செய்திகள் வெளியாகி சர்ச்சையை ஏற்படுத்தின. நிகழ்ச்சி முடிந்த பிறகு அந்தப் படம் மீண்டும் அதே இடத்தில் வைக்கப்பட்டதாகக் கூறப்பட்ட நிலையில், இந்தச் சம்பவம் அரசியல் வட்டாரத்தில் பெரும் விவாதப் பொருளாக மாறியது.

இதுகுறித்து திமுக கொள்கை பரப்பு இணைச் செயலாளர் ராஜீவ் காந்தி தனது எக்ஸ் (X) பக்கத்தில் அமைச்சரை நோக்கிக் கடுமையான கேள்விகளை எழுப்பினார். காமராஜர், அண்ணா, எம்ஜிஆர், பெரியார், பாரதியார் உள்ளிட்ட தலைவர்களின் புகைப்படங்கள் இருக்கும் அரங்கில், கருணாநிதியின் படம் மட்டும் ஏன் அகற்றப்பட்டது என்று கேள்வி எழுப்பிய அவர், நூலகத்தைச் சீரமைத்து தேவநேயப் பாவாணர் பெயரைச் சூட்டியதே கலைஞர் கருணாநிதிதான் என்பது அமைச்சர் ராஜ்மோகனுக்கும், அவரது கட்சித் தலைவர் நடிகர் விஜய்க்கும் தெரிய வாய்ப்பில்லை எனச் சாடினார்.

இச்சம்பவத்திற்குக் கண்டனம் தெரிவிக்கும் வகையில், திமுக மாணவர் அணி செயலாளர் வீரமணி ஜெயக்குமார் மற்றும் கட்சியின் நிர்வாகிகள் சம்பந்தப்பட்ட நூலகத்திற்கு நேரில் விரைந்து சென்று, அரசுக்கு எதிராகக் கண்டனப் போராட்டத்தில் ஈடுபட்டனர். இதனால் அந்தப் பகுதியில் பரபரப்பான சூழல் நிலவியது.

இறுதியாக, இப்புகார்கள் அனைத்தையும் தமிழ்நாடு அரசின் உண்மை சரிபார்க்கும் பிரிவு திட்டவட்டமாக மறுத்துள்ளது. இதுகுறித்து சென்னை மாவட்ட நூலக அலுவலர் அளித்த விளக்கத்தில், கடந்த ஏப்ரல் 8ஆம் தேதி அரங்கின் மின்சாதனப் பெட்டியில் ஏற்பட்ட தீ விபத்து காரணமாக, பராமரிப்புப் பணிகளுக்காகவே அங்கிருந்த புகைப்படங்கள் தற்காலிகமாகக் கழற்றப்பட்டதாகவும், பணிகள் முடிந்ததும் அவை மீண்டும் அதே இடத்தில் வைக்கப்பட்டுவிட்டதாகவும் தெரிவித்தார். எனவே, இதுகுறித்த தவறான தகவல்களைப் பரப்ப வேண்டாம் என்றும் அரசு கேட்டுக்கொண்டுள்ளது.