“சட்டமன்றத்திற்குள் நுழைந்த ‘குட்டி TVK’.. பெண் MLA-க்கள் செய்த செயலால் நெகிழ்ந்துபோன கோட்டை”..!!

தமிழ்நாட்டின் 17-வது சட்டமன்றத்தின் முதல் கூட்டத்தொடர் இன்று ஆளுநர் ராஜேந்திர விஸ்வநாத் அர்லேகர் அவர்களின் உரையுடன் முறைப்படி தொடங்கியுள்ளது. முதலமைச்சர் சி. ஜோசப் விஜய் தலைமையிலான புதிய அமைச்சரவையின் முதல் கூட்டத்தொடர் என்பதால் மிகுந்த முக்கியத்துவம் பெற்றுள்ள இந்தத் தொடர், சபாநாயகர் ஜே.சி.டி. பிரபாகர் தலைமையில் ஜூன் 19, 22 மற்றும் 23 ஆகிய தேதிகளில் மூன்று நாட்களுக்கு நடைபெறவுள்ளது. ஆளுநர் உரையில் சமூக நீதி கணக்கெடுப்பு, இருமொழிக் கொள்கை மற்றும் போதைப்பொருள் ஒழிப்பிற்கான சிறப்புப் படை போன்ற புதிய அரசின் முக்கிய கொள்கை அறிவிப்புகள் வெளியிடப்பட்ட வேளையில், சட்டம்-ஒழுங்கு பிரச்சினையை முன்வைத்து எதிர்க்கட்சித் தலைவர் உதயநிதி ஸ்டாலின் தலைமையிலான திமுகவினர் அவையிலிருந்து வெளிநடப்பு செய்ததால் கூட்டத்தொடரின் முதல் நாளே அரசியல் ரீதியாக மிகுந்த பரபரப்புடன் காணப்பட்டது.

இந்த அரசியல் பரபரப்புகளுக்கு மத்தியில், தமிழக வெற்றிக் கழகத்தின் சார்பில் சென்னை திரு.வி.க. நகர் தொகுதியில் போட்டியிட்டு வெற்றி பெற்ற சட்டமன்ற உறுப்பினர் பல்லவி தனது கைக்குழந்தையுடன் சட்டசபைக்கு வருகை தந்தது அனைவரின் கவனத்தையும் ஈர்த்தது. தேர்தல் பிரசாரத்தின்போதே கர்ப்பமாக இருந்து தீவிர வாக்கு சேகரிப்பில் ஈடுபட்ட அவர், பிரசவத்திற்குப் பின் தனது குழந்தைக்குக் கட்சியின் பெயரைக் குறிக்கும் வகையில் ‘டிவிகே’ என்று பெயர் சூட்டப்போவதாக அறிவித்திருந்தார். அவைக்கு வந்த அவர், வருகைப் பதிவேட்டில் கையெழுத்திட்ட பின்னர் பெண் எம்.எல்.ஏ.க்களுக்கான பிரத்யேக அறைக்குச் சென்றார்; அங்கு சக பெண் சட்டமன்ற உறுப்பினர்கள் சிலர் அவரது குழந்தையைக் கைகளில் ஏந்திக் கொஞ்சி மகிழ்ந்த நெகிழ்ச்சியான தருணங்களுக்குப் பிறகு, அவர் தனது குழந்தையுடன் அங்கிருந்து புறப்பட்டுச் சென்றார்.