ஈரான் மற்றும் இஸ்ரேல் இடையே நிலவி வரும் போர் சூழலால் பாகிஸ்தான் கடுமையான பொருளாதாரப் பாதிப்புகளை எதிர்கொண்டு வருவதாக அந்நாட்டுப் பிரதமர் ஷெபாஸ் ஷெரீப் தெரிவித்துள்ளார். சர்வதேச அளவில் எரிசக்தி விலை உயர்வு மற்றும் விநியோகச் சங்கிலியில் ஏற்பட்டுள்ள தடைகள் காரணமாக பாகிஸ்தான் ஒரு தசாப்தத்தில் இல்லாத அளவுக்குப் பெரும் பொருளாதார நெருக்கடிக்குத் தள்ளப்பட்டுள்ளதாக அவர் கவலை வெளியிட்டுள்ளார்.
குறிப்பாக, உலகச் சந்தையில் கச்சா எண்ணெய் விலை அதிகரிப்பு பாகிஸ்தானின் இறக்குமதிச் செலவை பலமடங்கு உயர்த்தியுள்ளது. ஏற்கனவே அந்நியச் செலாவணி கையிருப்பு குறைந்து, பணவீக்கம் உச்சத்தில் இருக்கும் நிலையில், இந்தப் போர் சூழல் பொருளாதாரத்தை மீட்கும் அரசின் முயற்சிகளுக்குப் பெரும் பின்னடைவை ஏற்படுத்தியுள்ளதாக ஷெரீப் குறிப்பிட்டுள்ளார்.
இந்த நெருக்கடியைச் சமாளிக்க எரிபொருள் பயன்பாட்டைக் குறைத்தல் மற்றும் அரசுச் செலவுகளைக் கட்டுப்படுத்துதல் போன்ற கடுமையான சிக்கன நடவடிக்கைகளை பாகிஸ்தான் அரசு அமல்படுத்தத் தொடங்கியுள்ளது. பிராந்தியத்தில் அமைதி நிலவினால் மட்டுமே பாகிஸ்தான் போன்ற வளரும் நாடுகளின் பொருளாதாரம் சீரடையும் என்றும், இதற்காக சர்வதேச நாடுகள் தலையிட வேண்டும் என்றும் அவர் வலியுறுத்தியுள்ளார்.