இணையத்தில் சாதாரணமாகப் பொழுதுபோக்கிற்காக ஆபாச வீடியோக்களைத் தேடிய ஒரு நபருக்கு, தனது வாழ்க்கையிலேயே மறக்க முடியாத ஒரு பேரதிர்ச்சி காத்திருந்தது. சீனாவைச் சேர்ந்த எரிக் என்ற நபர், ஒரு ஆபாச இணையதளத்தைப் பார்த்துக் கொண்டிருந்தபோது, அதில் இடம்பெற்றிருந்த ஒரு வீடியோவில் இருப்பது தானும், தனது காதலியும் என்பதை உணர்ந்து உறைந்து போனார். கடந்த 2023-ம் ஆண்டு அவர்கள் இருவரும் தென் சீனாவின் ஷென்ஜென் நகரில் உள்ள ஒரு ஹோட்டலில் தங்கியிருந்தபோது, அவர்களுக்குத் தெரியாமலேயே ரகசியமாகப் படம் பிடிக்கப்பட்ட காட்சிகள் அவை என்று பின்னர் தெரியவந்தது.
அந்த ஹோட்டல் அறையில் மறைக்கப்பட்டிருந்த உளவு கேமரா அவர்கள் அறைக்குள் நுழைந்தது முதல் அந்தரங்கமாக இருந்த வரை அனைத்தையும் துல்லியமாகப் பதிவு செய்திருந்தது. எரிக் கூறுகையில், “வழக்கமாக இத்தகைய வீடியோக்கள் செயற்கையாக இருக்கும் என்று நினைப்போம், ஆனால் இதில் இருப்பது நாம் தான் என்று தெரிந்தபோது ஏற்பட்ட பயம் விவரிக்க முடியாதது” என்றார். இந்த வீடியோ ஆயிரக்கணக்கானோரால் பார்க்கப்பட்டிருந்தது இவர்களுக்குப் பெரும் மன உளைச்சலை ஏற்படுத்தியது.
இந்தச் சம்பவம் அந்த ஜோடியின் தனிப்பட்ட வாழ்க்கையைச் சிதைத்தது. தனது காதலி எமிலியிடம் எரிக் இது குறித்துக் கூறியபோது, அவர் மிகுந்த அச்சத்திற்கும் அவமானத்திற்கும் உள்ளானார். தங்களை யாராவது அடையாளம் கண்டுவிடுவார்களோ என்ற பயத்தில் அவர்கள் பல வாரங்கள் வெளியே செல்வதைத் தவிர்த்தனர்; அப்படியே சென்றாலும் தங்களை மறைத்துக் கொள்ளத் தொப்பி அணிந்து கொண்டனர். மேலும், மீண்டும் ஒருமுறை இதுபோன்ற ஒரு நிலைக்கு ஆளாகக் கூடாது என்பதற்காக அவர்கள் ஹோட்டல்களில் தங்குவதையே நிறுத்திவிட்டனர்.
சீனாவில் இது போன்ற உளவு கேமரா புகார்கள் அதிகரித்து வருவதால், அரசு தற்போது கடுமையான விதிகளைக் கொண்டு வந்துள்ளது. ஹோட்டல் உரிமையாளர்கள் தங்கள் அறைகளில் கேமராக்கள் இல்லை என்பதை உறுதிப்படுத்த அவ்வப்போது சோதனை செய்ய வேண்டும் என்று உத்தரவிடப்பட்டுள்ளது. இருப்பினும், பிபிசி நடத்திய ஆய்வில் இன்னும் பல ஹோட்டல்களில் நூற்றுக்கணக்கான மறைக்கப்பட்ட கேமராக்கள் இருப்பது கண்டுபிடிக்கப்பட்டுள்ளது. இத்தகைய வீடியோக்கள் இணையத்தில் கள்ளத்தனமாக விற்பனை செய்யப்படுவதும், தனிமனித சுதந்திரத்திற்குப் பெரும் அச்சுறுத்தலாக மாறியுள்ளதும் குறிப்பிடத்தக்கது.