தோசை பார்சல் வாங்க வந்தவர் கொடுத்த பகீர்.. கண்ணில் மிளகாய் பொடியை தூவி நடந்த கொடூரம்… கதறிய ஹோட்டல் உரிமையாளர்..!!

கடலூர் மாவட்டம் சிதம்பரம் வடக்கு வீதியில் ‘குமர விலாஸ்’ என்ற ஹோட்டலை நடத்தி வரும் ராஜசுந்தரம் – ஜெயந்தி தம்பதியினரிடம், ஞாயிற்றுக்கிழமை இரவு காரில் வந்த வாலிபர் ஒருவர் தோசை பார்சல் கேட்டுள்ளார். அவர்கள் பார்சல் கட்டும் பணியில் பிஸியாக இருந்தபோது, அந்த வாலிபர் திடீரென தம்பதியினரின் கண்களில் மிளகாய்ப் பொடியைத் தூவியுள்ளார். பின்னர் ஜெயந்தி அணிந்திருந்த 20 கிராம் தங்கச் செயினைப் பறித்துக் கொண்டு தப்பி ஓட முயன்றுள்ளார்.

பாதிக்கப்பட்ட தம்பதியினரின் அலறல் சத்தம் கேட்டு ஓடிவந்த பொதுமக்கள், அந்த வாலிபரை விரட்டிப் பிடிக்க முயன்றனர். அப்போது, “என்னை பிடித்தால் கத்தியால் குத்திக் கொள்வேன்” என மிரட்டிய அந்த வாலிபர், தன் கையையும் கத்தியால் அறுத்துக் கொண்டதாகக் கூறப்படுகிறது. இதற்கிடையில், தகவலறிந்து சம்பவ இடத்திற்கு விரைந்து வந்த சிதம்பரம் காவல்துறையினர் பொதுமக்கள் உதவியுடன் அந்த வாலிபரை மடக்கிப் பிடித்துக் கைது செய்தனர்.

காவல்துறையினரின் முதற்கட்ட விசாரணையில், கைது செய்யப்பட்ட நபர் சேத்தியாத்தோப்பு அருகே உள்ள பெரியகுப்பம் கிராமத்தைச் சேர்ந்த சந்தோஷ்குமார் என்பது தெரியவந்தது. மேலும், தான் வாங்கிய கார் கடனுக்கான மாதாந்திரத் தவணையைச் செலுத்தப் பணம் தேவைப்பட்டதால் இந்த செயின் பறிப்பில் ஈடுபட்டதாக அவர் வாக்குமூலம் அளித்துள்ளார். இச்சம்பவம் சிதம்பரம் பகுதியில் பெரும் பரபரப்பை ஏற்படுத்தியுள்ளது.