“இளைஞர்களே ஏமாந்துடாதீங்க.. இன்ஸ்டா அரசியல் வேற.. நிஜ வாழ்க்கை வேற!”.. இளைஞர்களுக்கு வானதி சீனிவாசன் கொடுத்த ‘டோஸ்’… கோவையில் பரபரப்பு…!!!

கோவை வடக்குத் தொகுதி பாஜக வேட்பாளரும், அக்கட்சியின் தேசிய மகளிர் அணி தலைவருமான வானதி சீனிவாசன், சிவானந்த காலனியில் உள்ள காமராஜர் பள்ளியில் தனது வாக்கினைப் பதிவு செய்தார். பின்னர் செய்தியாளர்களைச் சந்தித்த அவர், தமிழகம் முழுவதும் மக்கள், குறிப்பாகப் பெண்களும் இளைஞர்களும் மிகுந்த ஆர்வத்துடன் வாக்குச் சாவடிகளுக்கு வந்து கொண்டிருப்பதைச் சுட்டிக்காட்டினார். ஆட்சி மாற்றம் ஏற்பட வேண்டும் என்பதில் மக்கள் உறுதியாக இருப்பதாகவும், தேர்தல் வாக்குறுதிகளை நிறைவேற்றக் கோரிப் போராடுபவர்களுக்கு விரைவில் நல்ல தீர்வு கிடைக்கும் என்றும் அவர் நம்பிக்கை தெரிவித்தார்.

தேர்தல் முறைகேடுகள் குறித்துப் பேசிய அவர், கோவை தெற்குத் தொகுதியில் தேர்தல் ஆணையத்தையே ஏமாற்றும் வகையில் அராஜகங்கள் நடைபெற்று வருவதாகக் குற்றம் சாட்டினார். திமுகவினர் வாக்காளர்களுக்கு கோல்டு காயின் மற்றும் சில்வர் காயின்களை வழங்கி ஏமாற்று வேலைகளில் ஈடுபட்டு வருவதாகப் புகார் தெரிவித்த அவர், மாநகராட்சித் தேர்தலைப் போலவே இப்போதும் நாடகம் ஆடுவதாகச் சாடினார். அண்ணாமலை மற்றும் நடிகர் விஜய் ஆகியோரின் ‘டிரஸ் கோடு’ குறித்த கேள்விக்கு பதிலளித்த அவர், ஆடையில் எதுவும் இல்லை என்றும், இளைஞர் சக்தியால் எதையும் சாதிக்க முடியும் என்றும் குறிப்பிட்டார்.

இளைஞர்களுக்கு அறிவுரை வழங்கிய வானதி சீனிவாசன், இன்ஸ்டாகிராம் போன்ற சமூக ஊடகங்களில் இருப்பது மட்டுமே அரசியல் ஆகாது என்று எச்சரித்தார். “ஸ்மார்ட் போனைத் தாண்டி உங்களுக்கு என்று ஒரு எதிர்காலம் இருக்கிறது; உங்கள் குடும்பத்தின் எதிர்பார்ப்புகள் உங்கள் மீது உள்ளன” என்று கூறிய அவர், இரண்டு மணி நேரம் பார்க்கும் சினிமா வேறு, நிஜ வாழ்க்கைக்கான அரசியல் வேறு என்பதை இளைஞர்கள் உணர வேண்டும் என்றார். சமூக ஊடகங்களை ஒரு கருவியாக மட்டுமே பார்க்க வேண்டும் என்றும், வாக்களிக்கும்போது புத்திசாலித்தனமாகச் செயல்பட்டுச் சரியான தலைவர்களைத் தேர்ந்தெடுக்க வேண்டும் என்றும் அவர் வலியுறுத்தினார்.