ரூ.100 கோடி நில மோசடி… “ஸ்கெட்ச் போட்ட சிபிசிஐடி… ‘நான் குற்றவாளியே இல்ல…’ ஜாமீன் மனுவில் கதறிய பிரமுகர்… உயர்நீதிமன்றத்தின் அதிரடி உத்தரவு…!

பழனி முருகன் கோவில் அறக்கட்டளைக்கு சொந்தமான, சுமார் ரூ.100 கோடி மதிப்புள்ள 1.40 ஏக்கர் நிலம் ரூ.2 கோடிக்கு முறைகேடாகப் பத்திரப்பதிவு செய்யப்பட்டது தமிழகம் முழுவதும் பெரும் அதிர்வலைகளை ஏற்படுத்தியது. அறநிலையத்துறை தொடர்ந்த வழக்கின் அடிப்படையில் உயர்நீதிமன்றம் அந்தப் பத்திரப்பதிவை ரத்து செய்ததுடன், சிபிசிஐடி போலீசாரும் விசாரணை மேற்கொண்டு வருகின்றனர். இந்நிலையில், இவ்வழக்கில் முக்கிய குற்றவாளியாகச் சேர்க்கப்பட்டுள்ள வெள்ளத்துரை, தனக்கு முன்ஜாமீன் வழங்கக் கோரி சென்னை உயர்நீதிமன்ற மதுரை கிளையில் மனுத் தாக்கல் செய்துள்ளார்.

தனது மனுவில், சமீபத்தில் சொத்து ஒன்றை விற்றதன் மூலம் கிடைத்த ரூ.2 கோடி பணத்திற்கு வரி செலுத்துவதைத் தவிர்க்க, ஆடிட்டரின் அறிவுரைப்படி பழனி மலை அடிவாரத்தில் உள்ள நிலத்தை வாங்க முடிவு செய்ததாக வெள்ளத்துரை தெரிவித்துள்ளார். சட்டப்பூர்வ ஆவணங்களைச் சரிபார்த்த பின்னரே நிலத்தை வாங்க முற்பட்டதாகவும், ஆரம்பத்தில் பத்திரப்பதிவு செய்ய மறுக்கப்பட்டதால் நீதிமன்ற உத்தரவைப் பெற்றே நிலத்தைப் பதிவு செய்ததாகவும் அவர் குறிப்பிட்டுள்ளார். மேலும், உழைத்துச் சேர்த்த பணத்தில் வாங்கிய இந்த நில விவகாரத்தில், அரசியல் பழிவாங்கும் நோக்கில் தம்மைக் தேவையின்றிச் சிக்க வைத்துள்ளதாக அவர் குற்றம் சாட்டியுள்ளார்.

முன்பு தனியாரிடம் விளக்கம் கேட்காமல் பத்திரப்பதிவு ரத்து செய்யப்பட்டதைச் சுட்டிக்காட்டிய அவர், தமக்கு முன்ஜாமீன் வழங்கிட வேண்டும் எனக் கோரியுள்ளார். இந்த மனுவை விசாரணைக்கு ஏற்றுக்கொண்ட உயர்நீதிமன்ற மதுரை கிளை, வழக்கின் எதிர்மனுதாரராக சிபிசிஐடி காவல்துறையைச் சேர்த்து உத்தரவிட்டு விசாரணையை ஒத்திவைத்துள்ளது. பழனி கோவில் நில விவகாரத்தில் சிபிசிஐடி விசாரணை தீவிரமடைந்து வரும் சூழலில், இந்த ஜாமீன் மனு மீதான விசாரணை நிலவரம் பெரும் எதிர்பார்ப்பை ஏற்படுத்தியுள்ளது.