“விஜய்க்கு ஆதரவு.. ஆனா ஒரு கண்டிஷன்!”… சட்டப்பேரவையில் வன்னி அரசு போட்ட அதிரடி ‘செக்’… ஆடிப்போன தவெக…!!!

தமிழகத்தில் குடியரசுத் தலைவர் ஆட்சியை அமல்படுத்தத் துடிக்கும் பாஜகவின் மறைமுகச் சதியை முறியடிக்கவே, முதலமைச்சர் விஜய் தலைமையிலான தவெக அரசுக்கு ஆதரவு அளிப்பதாக வன்னி அரசு தெரிவித்தார். மதச்சார்பற்ற கட்சிகளின் துணையோடு அமைந்துள்ள இந்த அரசு, ஐந்து ஆண்டுகள் முழுமையாக நீடிக்க வேண்டும் என வாழ்த்திய அவர், மாநில உரிமைகளைப் பாதுகாப்பதில் புதிய அரசு எந்தவித சமரசமும் செய்து கொள்ளக் கூடாது என வலியுறுத்தினார்.

முன்னாள் முதலமைச்சர் மு.க. ஸ்டாலின் தலைமையில் மதச்சார்பற்ற கட்சிகள் ஒருங்கிணைந்து ஒன்றிய அரசின் தொகுதி மறுவரையறை சதியை முறியடித்ததை முன்னுதாரணமாகச் சுட்டிக்காட்டினார். அதேபோன்றதொரு உறுதியான நிலைப்பாட்டை மாநில உரிமைகள் சார்ந்து தவெக அரசு எடுக்க வேண்டும் என்றும், ஒன்றிய அரசுக்கு அடிபணியாமல் செயல்பட வேண்டும் என்றும் அவர் கேட்டுக்கொண்டார்.

அறிவியல் சார்ந்த திட்டங்களுக்கு முன்னுரிமை அளிக்க வேண்டும் எனக் குறிப்பிட்ட வன்னி அரசு, ஜோதிடம், பில்லி சூனியம் போன்ற மூடநம்பிக்கைகளுக்கு இந்த அரசு இடம் கொடுத்துவிடக் கூடாது என எச்சரித்தார். கர்நாடகா மற்றும் மகாராஷ்டிரா மாநிலங்களில் இருப்பதைப் போல, தமிழ்நாட்டிலும் மூடநம்பிக்கைகளுக்கு எதிராகக் கடுமையான சட்டத்தை இயற்ற வேண்டும் எனப் புதிய அரசுக்கு அவர் கோரிக்கை விடுத்தார்.

இறுதியாக, சமூக நீதியைப் பாதுகாக்கும் வகையில் தமிழ்நாட்டில் ஆணவக் கொலைகளைத் தடுக்கத் தனிச் சட்டம் இயற்றப்பட வேண்டும் என வலியுறுத்தினார். ஏற்கெனவே திமுக அரசு கொண்டு வந்த ஆணையத்தின் பரிந்துரைகளை ஏற்று, ‘ஆணவக் கொலை சிறப்புத் தடுப்புச் சட்டத்தை’ உடனடியாக நடைமுறைப்படுத்த வேண்டும் என்று தவெக அரசை வன்னி அரசு கேட்டுக்கொண்டார்.