“கடைசியா ஒரு முறை பேசணும்..” கதவை சாத்திய கணவன் செய்த கொடூரம்… ரத்த வெள்ளத்தில் சரிந்த பரிதாபம்… கொலையின் அதிர்ச்சியூட்டும் பின்னணி…!!

சென்னை காசிமேட்டில் மீன்பிடித் தொழில் செய்து வரும் சிவாவுக்கும், வியாசர்பாடியைச் சேர்ந்த வெண்ணிலாவுக்கும் ஒன்பது ஆண்டுகளுக்கு முன்பு திருமணம் நடந்துள்ளது. இவர்களுக்கு இரண்டு பெண் குழந்தைகளும் ஒரு ஆண் குழந்தையும் உள்ளனர். இந்நிலையில், சிவாவின் அதீத குடிப்பழக்கம் மற்றும் மனைவியை தொடர்ந்து அடித்துத் துன்புறுத்தும் குணம் காரணமாக, கணவனின் கொடுமை தாங்க முடியாத வெண்ணிலா, கடந்த ஒரு மாதமாக தனது தாய் தேவியின் வீட்டில் குழந்தைகளுடன் பிரிந்து வசித்து வந்துள்ளார்.

சம்பவத்தன்று, வியாசர்பாடியில் உள்ள தனது அக்கா வீட்டில் வெண்ணிலா இருந்தபோது, அங்கு வந்த சிவா அவரிடம் தனியாகப் பேச வேண்டும் என்று கூறியுள்ளார். சுமார் அரை மணி நேரம் இருவருக்கும் இடையே நடந்த பேச்சுவார்த்தை திடீரென கடுமையான வாக்குவாதமாக மாறியுள்ளது. அப்போது, ஆத்திரமடைந்த சிவா தான் மறைத்து வைத்திருந்த கத்தியை எடுத்து வெண்ணிலாவின் கழுத்தில் சரமாரியாக வெட்டிவிட்டு அங்கிருந்து தப்பியோடினார். அலறல் சத்தம் கேட்டு ஓடிவந்த தாய் மற்றும் சகோதரி, வெண்ணிலா ரத்த வெள்ளத்தில் துடிதுடித்து உயிரிழந்ததைக் கண்டு அதிர்ச்சியடைந்தனர்.

இந்த பயங்கர சம்பவம் குறித்து தகவலறிந்த எம்.கே.பி. நகர் காவல்துறையினர், உடனடியாக சம்பவ இடத்திற்கு விரைந்து வந்து வெண்ணிலாவின் உடலை மீட்டு பிரேத பரிசோதனைக்காக சென்னை ஸ்டான்லி அரசு மருத்துவமனைக்கு அனுப்பி வைத்தனர். சமாதானம் பேசுவது போல் நடித்து மனைவியை கொடூரமாக கொலை செய்துவிட்டு தலைமறைவாகியுள்ள சிவாவை காவல்துறையினர் தீவிரமாகத் தேடி வருகின்றனர். குடும்பப் பிரச்சனை காரணமாக நடந்த இந்த படுகொலை சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.