தமிழ் சினிமாவில் இன்றிருக்கும் நம்பிக்கைக்குரிய இயக்குனர்களில் முதன்மையானவராக இருக்கிறார் வெற்றிமாறன். பொல்லாதவன், ஆடுகளம், விசாரணை, வட சென்னை, அசுரன் மற்றும் விடுதலை என குறைவான படங்களையே அவர் இயக்கி இருந்தாலும் அந்த படங்களின் தாக்கம் மிக அதிகமாக இருக்கிறது.
முன்னணி நடிகர்களை வைத்து கதையில் சமாதானங்கள் இல்லாமல் அவர் எடுக்கும் படங்கள் கமர்ஷியலாகவும் வெற்றி பெறுகின்றன. இதனால் அவர் இயக்கத்தில் நடிக்க முன்னணி நடிகர்கள் ஆசைப்படுகிறார்கள். தற்போது விடுதலை -2 படத்தை இயக்கி வரும் வெற்றிமாறன் அடுத்து சூர்யாவை வைத்து வாடிவாசல் படத்தை இயக்கவுள்ளார்.
இந்நிலையில் இப்போது அவர் நான்கு ஆண்டுகளாக உருவாக்கி வரும் விடுதலை படத்தின் இரண்டாம் பாகம் வெளியாகி மிகப்பெரிய அளவில் விவாதங்களை உருவாக்கியுள்ளது. இந்த படத்தில் நடித்துள்ள பல நடிகர்களின் நடிப்பும் பாராட்டுகளைப் பெற்று வருகிறது.
இதையடுத்து அவர் நீண்டகாலமாகக் காத்திருக்கும் வாடிவாசல் படத்தைத் தொடங்குவார் என தெரிகிறது. இந்த படத்தில் சூர்யா, அமீர் ஆகியோர் முக்கிய வேடங்களில் நடிக்க ஜி வி பிரகாஷ் இசையமைக்க கலைப்புலி எஸ் தாணு தயாரிக்கிறார்.
இந்த படத்தின் முன் தயாரிப்புப் பணிகள் இங்கிலாந்தில் மும்முரமாக நடந்து வருகின்றன. இந்நிலையில் படம் பற்றி பேசியுள்ள தயாரிப்பாளர் தாணு “இயக்குனர் வெற்றிமாறனை பல முன்னணிக் கதாநாயர்கள் அழைத்துப் படம் பண்ணலாம் என்றார்கள். பல தயாரிப்பு நிறுவனங்கள் ஏன் சன் பிக்சர்ஸ் கூட அழைத்தார்கள். ஆனால் அவர் ‘வாடிவாசல்’ படத்தை முடித்துவிட்டு வருகிறேன் என்று சொல்லிவிட்டார். அந்த அளவுக்கு வார்த்தை சுத்தம் உள்ளவர் வெற்றிமாறன்.” எனப் பாராட்டியுள்ளார்.
வாடிவாசல் என்ற நாவலில் உந்துதல் பெற்று வெற்றிமாறன் மூன்று பாகங்களாக இதற்கு திரைக்கதை எழுதியுள்ளதாக சொல்லப்படுகிறது.