மத்திய கிழக்கு பிராந்தியத்தில் நிலவும் போர்ச் சூழலால், சர்வதேச கடல் வணிகப் பாதையான ஹார்முஸ் ஜலசந்தியில் பெரும் பதற்றம் நிலவுகிறது. ஐக்கிய அமீரகத்தின் கலிஃபா துறைமுகத்திலிருந்து இந்தியாவின் காண்ட்லா துறைமுகத்தை நோக்கிச் சென்ற ‘மயூரி நாரி’ (Mayuree Naree) என்ற தாய்லாந்து நாட்டின் சரக்குக் கப்பல் மீது புதன்கிழமை எதிர்பாராத தாக்குதல் நடத்தப்பட்டுள்ளது. 178 மீட்டர் நீளம் கொண்ட இந்த கப்பல் தாக்கப்பட்டதைத் தொடர்ந்து, அதிலிருந்து கரும்புகை வெளியேறும் காட்சிகள் இணையத்தில் வேகமாகப் பரவி வருகின்றன.
இந்தக் கொடூரத் தாக்குதலில் கப்பலில் இருந்த 20 மாலுமிகளை ஓமன் கடற்படையினர் பத்திரமாக மீட்டனர். இருப்பினும், கப்பலில் பணிபுரிந்தவர்களில் மூன்று பேரின் நிலை என்னவென்று தெரியவில்லை என்றும், அவர்களைத் தேடும் பணி தீவிரமாக நடைபெற்று வருவதாகவும் தாய்லாந்து கடற்படை தெரிவித்துள்ளது. இங்கிலாந்து கடல்சார் வர்த்தக மையம், மொத்தம் மூன்று வணிகக் கப்பல்கள் தாக்கப்பட்டதாக உறுதிப்படுத்தியுள்ளது, இது அந்தப் பகுதியில் நிலவும் பாதுகாப்பின்மையைக் காட்டுகிறது.
இஸ்ரேல்-அமெரிக்கா கூட்டணிக்கும் ஈரானுக்கும் இடையே நீடிக்கும் மோதலே இந்தத் தாக்குதல்களுக்கு முதன்மைக் காரணமாகக் கருதப்படுகிறது. ஈரானும், ஹிஸ்புல்லா அமைப்பும் இப்பகுதியில் செல்லும் கப்பல்களைத் தாக்குவதாகத் தொடர்ந்து மிரட்டல் விடுத்து வரும் நிலையில், இந்தத் தாக்குதலுக்கு இதுவரை எந்த அமைப்பும் பொறுப்பேற்கவில்லை. இது குறித்து விரிவான விசாரணை நடைபெற்று வருவதாகத் தகவல்கள் தெரிவிக்கின்றன.
உலகின் முக்கிய எரிசக்தி வழித்தடமான ஹார்முஸ் ஜலசந்தியில் நடைபெறும் இத்தகைய தாக்குதல்கள், சர்வதேச கப்பல் போக்குவரத்திற்கும், கச்சா எண்ணெய் விநியோகத்திற்கும் பெரும் அச்சுறுத்தலாக மாறியுள்ளன. பிப்ரவரி இறுதியில் தொடங்கிய இந்த மோதல் போக்கு, தற்போது வணிகக் கப்பல்களைக் குறிவைக்கும் நிலையை எட்டியிருப்பது, மத்திய கிழக்கு நாடுகளிடையே பதற்றத்தை மேலும் அதிகரித்துள்ளது.