நாட்டையே உலுக்கிய 3 சகோதரிகள் தற்கொலை வழக்கில் 8 பக்க கடிதம், 14 சாட்சிகள்….17 நாள் விசாரணையில் வெளிவந்த திடுக்கிடும் உண்மைகள்..!!

உத்தரப் பிரதேச மாநிலம் காசியாபாத்தில் உள்ள அடுக்குமாடி குடியிருப்பின் 9-வது தளத்திலிருந்து குதித்து மூன்று சகோதரிகள் தற்கொலை செய்துகொண்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. இது குறித்து கடந்த 17 நாட்களாகத் தீவிர விசாரணை நடத்தி வரும் காவல்துறை, தற்போது 14 சாட்சிகளிடம் வாக்குமூலம் பெற்றுள்ளது. இந்த விசாரணையின் ஒரு பகுதியாக, உயிரிழந்த சிறுமிகள் எழுதி வைத்திருந்த 8 பக்க தற்கொலை கடிதத்தை அதிகாரிகள் கைப்பற்றியுள்ளனர். அதில் அவர்களின் உயிரிழப்பிற்குப் பின்னால் இருந்த மனவேதனையான காரணங்கள் குறித்துப் பல திடுக்கிடும் தகவல்கள் வெளியாகியுள்ளன.

கைப்பற்றப்பட்ட கடிதத்தில், அந்தச் சகோதரிகள் கொரிய கலாச்சாரம் மற்றும் கொரிய விளையாட்டுகள் (Korean Games) மீது அதீத ஈடுபாடு கொண்டிருந்தது தெரியவந்துள்ளது. தங்களது மூன்று வயதுடைய மாற்றாந்தாய் தங்கைக்கும் கொரிய கலாச்சாரத்தைக் கற்றுக்கொடுக்க அவர்கள் விரும்பியுள்ளனர். ஆனால், குடும்ப உறுப்பினர்கள் அதற்குத் தடை விதித்ததோடு, தங்களை அநாவசியமாகக் கட்டுப்படுத்துவதாகவும் அவர்கள் வருத்தம் தெரிவித்துள்ளனர். தங்களுக்குப் பிடித்தமான அந்த “கொரிய உலகத்திலிருந்து” தங்களைப் பிரிக்க முயன்ற பெற்றோரின் முடிவே, அவர்களை இந்த விபரீத முடிவை எடுக்கத் தூண்டியதாக அந்தக் கடிதத்தில் உருக்கமாகக் குறிப்பிடப்பட்டுள்ளது.

இந்த வழக்கை விசாரிக்கும் காவல்துறையினர், அந்தச் சிறுமிகள் பயன்படுத்திய இரண்டு அலைபேசிகள் சம்பவத்திற்கு சில நாட்களுக்கு முன்னரே விற்கப்பட்டிருப்பதைக் கண்டறிந்துள்ளனர். மேலும், அந்தச் சிறுமிகளின் தந்தை மூன்று திருமணங்கள் செய்துகொண்டவர் என்பதால், அந்தச் சிக்கலான குடும்பச் சூழல் சிறுமிகளின் மனநிலையில் ஏதேனும் தாக்கத்தை ஏற்படுத்தியதா என்ற கோணத்திலும் விசாரணை முடுக்கிவிடப்பட்டுள்ளது. தற்போது பிரேதப் பரிசோதனை அறிக்கைகள் மற்றும் தடயவியல் சோதனைகளின் அடிப்படையில், இது ஒரு திட்டமிட்ட தற்கொலை தானா அல்லது இதற்குப் பின்னால் வேறு ஏதேனும் தூண்டுதல்கள் இருந்ததா என்பது குறித்து அதிகாரிகள் விரிவான விசாரணை மேற்கொண்டு வருகின்றனர்.