ஐயோ கொடுமையே… ரீல்ஸ் மோகத்தால் சீரழியும் இளைஞர்கள்… இந்தியாவை உலுக்கிய ஐ.எஸ்.ஐ-யின் அதிர்ச்சி வலைப்பின்னல்… இணையத்தில் வைரல்…!!

பாகிஸ்தானை தளமாகக் கொண்ட ஐ.எஸ்.ஐ ஆதரவு பெற்ற ஷெஹ்சாத் பாட்டி தலைமையிலான தீவிரவாத வலைப்பின்னல், இந்திய இளைஞர்களை இலக்கு வைத்து இன்ஸ்டாகிராம் ரீல்ஸ் மற்றும் சமூக வலைதளங்கள் மூலம் மூளைச்சலவை செய்து தீவிரவாத நடவடிக்கைகளில் ஈடுபடுத்திய அதிர்ச்சித் தகவலை இந்தியா டுடே புலனாய்வு அம்பலப்படுத்தியுள்ளது. 18 முதல் 25 வயதுடைய இளைஞர்களை இன்ஸ்டாகிராம் மூலம் தொடர்புகொண்டு, மத உணர்வுகளைத் தூண்டி, பணம் மற்றும் வெளிநாடுகளில் குடியேற போலி பாஸ்போர்ட் போன்ற ஆசைகளைக் காட்டி இந்த நெட்வொர்க் சட்டவிரோத செயல்களுக்குள் இழுத்துள்ளது.

இந்த ஆபத்தான வலையில் சிக்கிய இளைஞர்கள் மூலம் பஞ்சாப் உட்பட பல மாநிலங்களில் குறிப்பிட்ட இலக்குகளைக் கொல்வது, ஜலந்தரில் உள்ள பி.எஸ்.எஃப் தலைமையகம் மீதான குண்டுவெடிப்பு மற்றும் ஜார்கண்டில் உள்ள ஆர்.எஸ்.எஸ் அலுவலக தாக்குதல் போன்ற வன்முறை சம்பவங்கள் திட்டமிட்டு நடத்தப்பட்டுள்ளன. தொடக்கத்தில் சமூக வலைதளங்களில் சாதாரண தொடர்பை ஏற்படுத்தி, பின்னர் வாட்ஸ்அப், சிக்னல் போன்ற ரகசிய தளங்களுக்கு மாற்றி இத்தகைய தீவிரவாத வேலைகளை அவர்கள் கொடுத்து வந்துள்ளனர்.

மத்திய உள்துறை அமைச்சகத்தின் மேற்பார்வையில், மத்திய புலனாய்வு அமைப்புகளும் மாநில காவல்துறையினரும் இணைந்து நாடு முழுவதும் நடத்திய தீவிர நடவடிக்கைகளின் மூலம் இந்த நெட்வொர்க்குடன் தொடர்புடைய சுமார் 700 பேர் கைது செய்யப்பட்டுள்ளனர். மேலும் 700-க்கும் மேற்பட்டோர் விசாரிக்கப்பட்டு எச்சரித்து அனுப்பப்பட்டுள்ளனர். இதன் தீவிரத்தைக் கருத்தில் கொண்டு, ஷெஹ்சாத் பாட்டி நெட்வொர்க்கை சட்டவிரோத நடவடிக்கைகள் தடுப்புச் சட்டத்தின் கீழ் பயங்கரவாத அமைப்பாக மத்திய அரசு அறிவித்துள்ளது.